王浩信簽內地娛樂公司　登陸插旗密密斟Job

視帝王浩信去年離巢無綫後主力內地發展，日前他終於跟內地娛樂公司「天浩盛世娛樂」，此公司本身有炮製自家劇集及綜藝節目，旗下藝人有戚薇、姚安娜、陳飛宇等，而娛樂公司亦於其官網公布消息歡迎浩信加盟，並配文：「王浩信簽約天浩盛世，歡迎演員王浩信加入天浩盛世大家庭，未來一路相伴，開啟全新旅程。」

王浩信接受東網獨家訪問時謂：「內地工作全部由佢哋幫我處理，包括所有劇集同媒體安排，佢哋嘅劇集有好多都對我好合適，所以依家一路都有傾緊啲劇本同綜藝節目，至於香港工作方面，公司都好好，畀番空間我自己處理。(會否同內地公司旗下藝人合作？)都有機會嘅，因為公司都好多藝人，作為一個香港演員，希望有更多唔同嘅可能性，唔係剩係演香港人角色，希望有更多唔同題材同角色發揮，跟唔同嘅演員合作。」而浩信有份參與的無綫台慶劇《黑色月光》剛剛在港開播，問他會否返港作宣傳時，他謂：「會呀！呢段時間完成合約流程同處理埋手上啲工作先，之後我就會返嚟一齊宣傳。」