虞書欣新劇熱度緊追趙露思　開播9分鐘就劇終

內地人氣「95後小花」虞書欣，由佢同丁禹兮主演嘅新劇《永夜星河》於日前播出首集，劇中飾演「凌妙妙」並穿越古代嘅佢，意外成為反派女二「林虞」，未料因情緒崩潰衝出屋外嘅佢，竟然被一道雷就地劈死，隨即畫面更全黑出現「全劇終」3個大字，緊接着更出現連串工作人員名單，9分鐘就全劇終嘅離奇劇情，引嚟唔少網友留言道：「第一集全劇終笑死我哈哈哈！」、「系統：讓我想想還有甚麼離奇的死法。」、「永夜星河太有創意，開場就劇終。」、「這三個字出現的時候我有點懵了！」

事實上，由虞書欣、丁禹兮搭擋演出嘅《永夜星河》，同由趙露思及劉宇寧主演嘅《珠簾玉幕》，2部古裝劇都巧合咁喺11月1日首播，而據內地網劇播放排行榜顯示，由《珠簾玉幕》以83.88分奪得冠軍，《永夜星河》則以82.18緊追其後。