黃美芬跟童星黃梓樂鬥苦情　喊戲獲讚

藝人黃美芬早前與旗下藝人袁富華為電影《得寵先生》演出，飾演童星黃梓樂的媽咪，戲中兩人有一場抱着痛哭的戲份，感染力十足，先後獲導演以及演員鄭丹瑞稱讚，美芬笑言：「導演講嘅時候，我當佢客氣講笑，但之後見到旦哥（鄭丹瑞）佢都有講，真係好開心，始終我咁無拍戲，佢哋嘅稱讚畀咗信心我。（同袁富華有無對手戲？）無，主要同旦哥同梓樂，今次我嘅戲份竟然比Ben（袁富華）多，佢都猛話今次我多過佢（戲份），以前我十幾歲同佢一齊做舞台劇開始，未試過拍嘢多戲過佢，今次都係第一次。」

《得》片除了有袁富華、黃美芬兩位好戲之人外，還有廖子妤、馮允謙等，美芬大讚大家都做得很好：「廖子妤係做鄭丹瑞個女，有場戲係喺一個花園度拍，子妤完全做到個場戲嘅感覺，氛圍好好，係一位好有實力嘅演員。」