虞書欣公然偷拍劉亦菲　Zoom in一部位過程曝光

內地平台尋日（6日）舉行影視活動，吸引大批紅星盛裝出席，當中憑新劇《永夜星河》人氣再次三級跳嘅「95後小花」虞書欣，今次以粉紅Tube Dress晒青春味，估唔到佢仲做埋全場焦點，今日（7日）繼續現身熱搜，原因係佢被發現公然偷拍「神仙姐姐」劉亦菲！

尋日劉亦菲以一身綠色拖尾晚裝壓軸登場，謀殺現場唔少閃光燈，佢亦被安排同一班一線明星坐埋一齊，同一行就有虞書欣份。當晚虞書欣被拍得忽然一個假動作舉起電話放面旁，坐佢隔籬嘅小生任嘉倫本身嚇一嚇，之後都偷笑，原來虞書欣係想偷拍偶像劉亦菲，仲將劉亦菲個樣放大，鏡頭直接對準嚟影，成個小粉絲上身咁，非常搞笑。其實虞書欣曾表示過欣賞演技精湛嘅劉亦菲，今次難得見到真人，仲要坐得咁近，梗係心郁郁想影低女神靚樣留念，此舉即被推上熱搜，收獲1.2億閱讀量。