莊思明視《巾幗》為事業里程碑：一個令自己開竅嘅角色

藝人莊思明於無綫台慶劇《巾幗梟雄之懸崖》內，與胡定欣及關嘉敏上演一幕幕姐妹情，令人動容，日前劇情更交代3人同場哭訴失戀。談到現實生活中有否試過類似情況，她坦言：「都試過同啲姐妹差唔多時間失戀，咪坐低一齊呻囉，又未至於抱頭痛哭嘅。（你最唔開心嗰次係點？）匿埋喺屋企唔願見人，因為唔想重複又重複向旁人交代，同埋唔係好想打理自己。（同對方再見不是朋友？）係㗎，雖然唔涉及第三者，但已經惡言相向，大家都講咗啲唔好聽嘅說話。」

談到今次與男友楊明分別擔演兩綫台慶劇，思明即謂：「睇完我哋就睇佢哋嗰套，幾好呀，冇所謂㗎。（一齊喺度追劇？）收工收得早都會，由《愛．回家之開心速遞》一直睇落去，處境劇我都有份演嘛。（啲人讚你演技進步咗。）多謝大家，我諗每個演員都要撞啱一個角色，同埋keep住一路去演，就當係一種訓練，去到某個階段撞啱一個令自己開竅嘅角色就得喇。（呢次算係你嘅里程碑？）絕對算，好多謝監製方駿釗將一個咁好嘅角色交由我去演。」