陳家樂兩台走唔尷尬　岑麗香拍接吻戲驚囝囝呷醋

藝人陳家樂與岑麗香（香香），栢天男，敖嘉年，蘇韻姿及陳思圻（Vicky）等，今日（10日）出席HOY TV首部原創劇《我愛九龍城》記者會。家樂和香香在劇中關係複雜，飾演麻雀館太子爺的他跟香香青梅竹馬，但香香又跟飾演醫生的栢天男是情侶關係，問家樂可有信心爭女成功？他笑言：「我咁嘅樣邊有得爭呀？！」他們又說有年輕的戲份，所以已試了後生版造型，家樂說：「演番10幾歲，但年紀再細啲就唔得，好在唔使着校服。（可以接受到扮細？）頭以下就可以接受囉。」

問到香香在劇中可有親熱戲？她說和栢天男都有情侶間的親吻及擁抱，但她其實不想拍接吻戲：「我接受唔到，因為我係媽媽身份，如果有拍就唔會畀兩個仔睇，因為佢哋太細個，唔識分做戲同真實會呷醋，我試過拍廣告抱其他小朋友，同其他演員演一家人時，佢會問點解我同其他人一齊，仲試過喊添。（唔怕老公呷醋？）呢啲私底下關埋門再傾。」

香香又說再接劇全因劇本好及劇情吸引，令她追住看，她說：「零晨3，4點熄晒燈，陪緊仔時都用電筒照住嚟睇劇本。」又跟監製說自己的中文有進步，不會再有太多併音。

問到家樂為無綫拍攝的劇集《異空感應》快播出可會配合宣傳？他說會兩台走，因拍新劇不會全日開工。再問為HOY TV拍劇又幫無綫宣傳新劇可覺身份尷尬，他謂：「唔會有尷尬感覺，因為我經理人合約唔係無綫。」

劇集監製林建祥被問到蘇韻姿的角色本意屬「HOY TV一姐」菊梓喬，但他只說依劇本角色，一早就傾蘇韻姿，不過又補充說：「公司內部點傾就唔知。（可會找菊梓喬唱劇集主題曲或片尾曲？）未知，唔排除搵佢唱劇集歌。」

至於有指蘇韻姿的角色原屬菊梓喬，蘇韻姿一臉愕然說：「我唔清楚喎，只知收到劇本後就做準備。」離開無綫半年即有新劇接拍，她表示相當期待，又指跟Vicky雖然曾合拍無綫處境劇《愛•回家之開心速遞》，但只合作拍群戲而非對手戲，所以算是首度正式合作，不過在劇中卻跟她爭敖嘉年，她說：「戲外戲內都未試過同人爭仔，劇中我哋本身仲係朋友，不過唔知對方同自己男友一齊，因為我係飾演髮型師，為配合角色會有大膽嘅髮型，仲有露腰嘅青春造型。」

而Vicky聞對方等半年就有工開大感羡慕，自言等了3年，最開心重遇《愛》的班底，而她的劇中角色較狂野，都會有低胸造型，但就不用泳裝上陣，笑言天氣轉涼會拍凍。

談及二人同是無綫出身，今次倒戈接拍友台劇可會尷尬？蘇韻姿直言：「香港嘅演出機會唔多，電視台都係得幾間，機會嚟到就要做，兼且會盡心盡力做好。（會否叫『熊家』捧場？）到時會大力宣傳，叫佢哋收睇。（接拍前有冇問『前家人』如劉丹意見？）佢哋都應該好忙，但我有問過監製意見嘅。」