阮浩棕台慶表演企C位　與林正峰嘆冇抽獎命

藝人何沛珈緋聞男友阮浩棕和林正峰，與多位男演員今日（10日）為《萬千星輝賀台慶》排練，表演拉弓的阮浩棕企C位，問到是否象徵受公司重用，他說：「唔敢咁諗，動作配合上啫。」又指和其他演員負責台慶Opening的歌舞表演其中一部分，重演80年代經典古裝劇角色，他說：「我係扮《成吉思汗》嘅鐵木真，之後仲有啲歌舞表演，我之前都係內地都拍過古裝劇，嚟緊新劇《異空感應》就出街，劇中我係幫陳家樂查案嘅，但我個角色係大悲劇，（係忠定奸？）大家留意新劇啦。」

而林正峰則手拎一碌竹排練，他說：「其實我係拎彎刀嘅，不過道具未整好，所以攞住碌竹頂住先，但我覺得自己似古惑仔，衝出嚟劈友嗰啲。」他又表示除在台慶負責表演外，最期望可以抽到台慶大獎，可是天生沒抽獎運：「讀書時，有30個同學，20個同學都抽到獎，我就係冇獎嗰10個之一，如果中獎就請食飯。」而阮浩棕亦自言沒抽獎運，惟有望運氣累積下，一中就中大獎。