娜扎疑戀張雲龍密密閨房過夜　原來同是天涯淪落人

新疆女神娜扎感情路一直唔多順利，去年更誤撻內地小生徐開騁，喺不知情下介入對方與女星張天愛感情，得知無辜「被小三」後急急斬纜，避過一劫。今日（14日）娜扎忽然爆出新戀情，有內地媒體拍到內地小生張雲龍兩次深夜前往娜扎屋企，仲都喺娜扎屋企過夜，疑似戀情曝光，話題「#娜札張雲龍戀情#」亦即喺熱搜登頂。

其實早於今年年中，二人共同演出綜藝節目《旅行任意門》時，網友就已經幫二人組CP，估唔到依家CP疑似成真，難怪二人傳緋聞即獲大批網友支持。二人於節目中玩對視遊戲，點知對視完就默契立刻扭頭躲開扮忙，當時已被其他嘉賓笑二人嘅表現「有啲嘢」。張雲龍又曾於節目中提到自己想拍拖，話佢媽咪叫佢搵個屬猴嘅女仔，娜扎正正就係猴年出世。

而張雲龍嘅感情生活都唔多如意，佢前年拍攝《最遙遠的距離》時就傳同女星鍾楚曦假戲真做，張雲龍被拍到直搗女方家待四日三夜，儘管雙方未回應，仍被視為低調熱戀中。但去年9月，鍾楚曦被拍到同憑《封神》爆紅嘅小生侯雯元拖手後公開戀情，女方即被懷疑無縫接軌，粉絲即為張雲龍心痛。