娜扎疑恋张云龙密密闺房过夜　原来同是天涯沦落人

新疆女神娜扎感情路一直唔多顺利，去年更误挞内地小生徐开骋，喺不知情下介入对方与女星张天爱感情，得知无辜“被小三”后急急斩缆，避过一劫。今日（14日）娜扎忽然爆出新恋情，有内地媒体拍到内地小生张云龙两次深夜前往娜扎屋企，仲都喺娜扎屋企过夜，疑似恋情曝光，话题“#娜札张云龙恋情#”亦即喺热搜登顶。

其实早于今年年中，二人共同演出综艺节目《旅行任意门》时，网友就已经帮二人组CP，估唔到依家CP疑似成真，难怪二人传绯闻即获大批网友支持。二人于节目中玩对视游戏，点知对视完就默契立刻扭头躲开扮忙，当时已被其他嘉宾笑二人嘅表现“有啲嘢”。张云龙又曾于节目中提到自己想拍拖，话佢妈咪叫佢搵个属猴嘅女仔，娜扎正正就系猴年出世。

而张云龙嘅感情生活都唔多如意，佢前年拍摄《最遥远的距离》时就传同女星锺楚曦假戏真做，张云龙被拍到直捣女方家待四日三夜，尽管双方未回应，仍被视为低调热恋中。但去年9月，锺楚曦被拍到同凭《封神》爆红嘅小生侯雯元拖手后公开恋情，女方即被怀疑无缝接轨，粉丝即为张云龙心痛。