祝緒丹憑新劇上位仍被彈　于正明言搵虞書欣先夠Level

有「最美周芷若」之稱嘅內地小花祝緒丹，早前被金牌製作人于正踢爆辭演新劇《五福臨門》女配角，疑為空出檔期接拍另一套由佢然女主角嘅新劇，被于正晒對話截圖直斥人品差，引發爭議。不過最近祝緒丹做女配角、「95後小花」虞書欣主演嘅新劇《永夜星河》爆紅，劇中男女主角、男女配角均成炙手可熱新星，人氣不得了。

咁啱于正今日（14日）出post談及自己想嘗試開短劇拍時，有網友就留言叫佢可以搵祝緒丹拍，依家對方已經爆紅、夠晒人氣同知名度，暗寸表示依家可以開戲畀人做女主角喇。此話一出，即激起于正怒火，句句有骨咁回覆：「女配上桌（意指上位）了嗎？沒有。我想去找虞書欣，我只找扛劇（意指一個演員就可以擔起成套劇）的。」明顯指祝緒丹依家都仲未夠level做佢啲劇嘅女主角，似乎對對方辭演一事仍耿耿於懷。大批祝緒丹粉絲即衝入于正社交網留言，叫佢唔好再理偶像嘅嘢，着于正先管好自己先，雙方火藥味十足，罵戰即登上熱搜。