黃曉明鞠躬急挽聲譽　葉珂豪車在手社交帳號都唔要

內地影帝黃曉明認愛比佢細15年嘅網紅葉珂後，二人被網友一沉百踩，尤其葉珂離婚、整容、人設造假等傳聞滿天飛，被網友嘲笑開創「珂學」，拖累男友過億製作新片上映2日僅收3百萬，日前更要喺新片宣傳活動上，為此哽咽向公眾鞠躬道歉，惟葉珂就同時被發現駕駛豪車現身上海外灘。繼早前葉珂宣布退出網路後，原來葉珂今次真係「兌現承諾」，今日（20日）有網友發現佢已注銷社交帳號！

網友發現葉珂社交平台帳號已注銷，被標示為自行申請關閉，亦有爆料者晒出同葉珂團隊嘅對話截圖，指葉珂一早申請注銷所有公開嘅社交帳號，即係陸續就會見到佢更多Account消失，就連佢最多人睇嘅短片平台Account都放棄埋，明顯係想徹底遠離網絡世界。對此，有網友都開始轉風向，叫大家冇必要捉住葉珂唔放，佢又冇做錯咩，勸大家放過女神。