蔡卓妍生日　張繼聰領軍劇組高唱生日歌祝賀

由張繼聰及蔡卓妍（阿Sa）主演的賀歲片《祥賭必贏》日前煞科，劇組特意為阿Sa提前慶祝11月22日的生日。當晚於一間麻雀館進行拍攝，阿Sa、阿聰、吳家忻（Kayan）與胡楓（修修）等演員云集「賀壽」，劇組還準備了一個獨特蛋糕，配有啤牌、籌碼、麻雀及金幣等賀歲元素送給壽星女，阿Sa邊揭生日牌，邊拉出一張張紅色和紫色大鈔：「現金啊，係現金啊，我第一次收咁嘅蛋糕呀！好鍾意個蛋糕啊，鍾意個餡呀，哈哈！」阿聰帶領劇組高唱生日歌，阿Sa搞笑接唱「Happy Birthday to me」，場面熱鬧。

阿聰則難忘與劇組合作的歡樂時光，每日都即興創作爆笑橋段，望能剪輯放入電影內日後公諸同好。至於首次參演賀歲片的Kayan即謂：「今次同咁多前輩合作，超緊張同超開心，感受喜劇嗰種好即場發揮嘅魔力，好耐未試過笑到嘎嘎嘎。」阿Sa接口爆料指阿聰拍戲笑到扭傷頸，而修修亦分享拍攝感受：「今次好高興能夠同幾位後輩合作，非常非常之開心，雖然係煞科，但係都唔捨得㗎，希望呢套戲叫好叫座。」