娱圈单打︱真正人生胜利组　唔系你想就得到

嗱，乜嘢叫做人生胜利组，睇吓呢两位靓女就知道。第一个靓女，系33岁前港姐何艳娟。佢2018年下嫁年长40岁、坐拥30亿身家嘅富商吴志诚，结果婚姻一年货仔玩完，传闻离婚获得3亿元赡养费。家阵全力周游列国享受人生，成为人中之凤。

喂，33岁女坐拥几亿身家，食一世都食唔完。努力取悦某君一段时间，换来一世无忧，比同龄人士提早几十年退休，你话唔系人生胜利组系乜呀？话说艳娟最近去咗伦敦感受圣诞气氛，周身名牌富泰过人，样子仲愈来愈精致。你有你话佢贪慕虚荣，佢有佢状态大勇，穷L唔恨得咁多！

另一位靓女，系现年62岁嘅超级大美人关之琳。系人都知，之之嘅绝世美貌颠倒众生，曾历两段婚姻，无数恋爱，多位富商都拜倒其石榴裙下。大美人最近发出霸气宣言：“我愿意为我的错误买单，但我不后悔我做的任何决定，我从不怀疑自己眼光。如果事与愿违，是我能力不够。”可谓掷地有声。

即系咁，香港地憎人富贵厌人贫，唔少酸民见到之之家住半山1.5亿元豪宅，华衣锦食享之不尽，就口出恶言，话之之成世人只情倾有钱佬，如今老来无子，无依无靠，其实呢啲都系井底之言。家阵之之就话畀大家知：我为自己人生负责，干卿底事！

咁又系呀，男人靠得住，猪乸会上树，亲生子不如近身钱。与其靠别人，不如靠自己。何况之之乜嘢男人都试过，人生多姿多采，根本冇嘢需要遗憾。做人嘅嘢，有今生冇来世，最紧要自己开心，唔好怨天尤人，大家又何必戴有色眼镜来看待！