娱圈单打︱结扎叫鸡冇冲突　识玩梗系要咁玩

韩国乐队FT Island都可谓多灾多难。继2019年爆出队长兼结他手崔锺勋，牵涉“郑俊英性爱聊天室”而永久消失娱乐圈后，另一结他手宋承炫亦在同年约满离队，成员由5人减至3人；殊不知鼓手崔珉焕一样唔生性，去年离婚后，今年遭前妻大爆他婚内背妻夜蒲及叫鸡成瘾，一时间舆论大哗，佢亦不得不退团避风头。

虽然前妻公开崔珉焕嘅通话录音，内容包括叫朋友一齐去夜店进行性交易，又叫时钟酒店帮佢准备两支牙刷及两个避孕套，但始终有声冇画，未有完全坐实佢召妓嘅真凭实据。崔珉焕日前高调透过社交平台发文，首度为事件解画，坚决否认叫鸡之馀，仲强调“冇做过要点证明”，又话去时钟酒店只系想自己一个静吓休息吓。喂，咁都得，有冇人信呢？

嗱，当地网民显然就唔信嘞，反问佢唔系叫鸡，做乜叫人准备两支牙刷及两个避孕套呀？哈哈哈，最爆一幕嚟啦，崔珉焕话刷牙只系保持个人卫生，佢早已结扎，根本唔需要避孕套喎，问你服未。

有口痕友就求结扎同叫鸡之间嘅关系，希望崔生可以指教一下。咁又系呀，佢同前妻仔女都生咗3个，系咪扎咗，鬼知咩。何况避孕套除咗避孕，仲可以预防爱滋病及其他性病。玩惯玩熟，梗系知道安全嘅重要性。

唉，最伤心都系FT Island粉丝，乐队得番李弘基与李在真二人活动，队不成队，团不成团。想当年，李弘基参演经典韩剧《原来是美男》非常讨好，佢亦总算规行矩步。家阵粉丝求神拜佛，就系希望两位“死剩种”生性，唔好衰收尾。