娱圈单打︱天王女神传挞着　寂寞的心有乜奇

刚刚回归K-POP乐坛的G-Dragon权志龙（GD）竟然传出新恋情！女主角不是别人，正正系早前搞出“爱情三角错”、形象一落千丈嘅韩韶禧！二人遭网民挖出现身同一场地嘅IG相片，包括坐喺同一张黑色梳化影相，以及喺同一幅涂鸦墙打卡。如果话系咁啱得咁跷，似乎又真系太跷了。

之不过，二人所属公司火速发声明否认，GD嘅粉丝随即松一口气，皆因唔少粉丝觉得，韩韶禧一旦陷入恋爱就会失控，恐怕连累GD重新起步嘅事业。计本栏话斋，Never Say Never，男未婚女未嫁，一个系K-POP天王，一个系新进女神，门当户对，挞着又有乜出奇？

睇番GD嘅情史，可谓非常丰富，所有绯闻女主角皆系索女。最出名当然系日本女星水原希子，二人多次被断正拍下夜会密照，据闻拍拖长达6年，直到女方移情别恋日本男星野村周平，先至无疾而终。GD仲伤心到写下《无题》一曲抒发失恋之苦。

伤心只系一阵啫，女死女还在。之后又传出GD搭上日本女星小松菜奈，其后又被网媒踢爆佢跟同公司嘅Black Pink女神Jennie大搞“社内恋爱”。GD仲公开话理想型系“猫系女生”，最好同样热爱音乐，摆明公开传情。可惜吖，Jennie好快就恋上V@BTS，GD仲愤而退追Jennie IG。

哈，睇嚟K-POP天王嘅恋爱史都几坎坷喎，周不时畀女飞。至于韩韶禧，同柳俊烈嘅短命恋爱搞到一镬泡，对柳哥前女友惠利咬实唔放，更惹起对方粉丝反感。希望女神下次拍拖唔好咁火爆啦，欲速则不达呀！