齊秦驚傳罹患肺癌晚期　老婆急急回應傳聞

64歲台灣歌手齊秦當年以代表作《大約在冬季》、《原來的我》、《無情的雨無情的你》，爆紅全中國，近年佢曾擔任《中國好聲音》導師，再次翻紅，吸引不少後生一輩嘅粉絲。不過近日佢被拍得於內地蘇州舉辦演唱會時，髮際線明顯後移、啤酒肚凸凸、歌聲大崩壞，令網友大彈佢「抽菸喝酒毀嗓子」。點知今日（24日）爆出佢罹患肺癌晚期，目前正在北京治療。

知情人士爆料，指齊秦經多方檢查後確診肺癌晚期，朋友建議佢飛國外或返台灣就醫，移居北京多年嘅佢，考慮後仍留於當地治療。據悉齊秦長期食煙飲酒，並且愛食檳榔，如今雖然重病纏身，但仍未住院，情緒穩定，積極配合治療，照常約朋友見面，並準備接下嚟嘅演出。而齊秦於11月16日蘇州登台表現走樣之後，同月24日原定於平陽參加群星演唱會，臨時以聲帶發炎為由取消演出。

目前人喺內地工作嘅齊秦家姐齊豫，聽到同事詢問此事亦相當震驚，問及弟弟肺癌末期傳言是否屬實？齊豫經理人表示：「真沒聽說⋯這（消息）來源是誰呀？」並表示：「我們正好和小哥（齊秦）經紀人一起，小哥之前感冒喉嚨是有不適，目前恢復中，也持續有工作。謝謝大家關心！」齊秦太太孫麗雅亦對此予以否認，透露齊秦被孩子傳染肺炎支原體同腺病毒，導致喉嚨潰瘍：「首先小哥身體很健康，他最近只是被孩子傳染肺炎支原體和腺病毒導致喉嚨潰瘍，一直在積極治療，至於各種癌，求求各位別咒了，人家好着呢？正在陪孩子們呢。」