娱圈单打︱爱上花滑女神　居港取悦佳人

唔通平安夜真系奇迹夜？继英国桌球天王、绰号“火箭”嘅奥苏里云申请优才计划移居香港后，港府喺平安夜当日再公布，另一来自英国嘅球手、桌球界“世一”卓林普，同样借该计划来港定居。大家都知，香港近年喺多项国际排名拾级而下，忽然获桌球大师青睐，可谓一扫乌气，吐气扬眉！

卓林普非常识做，公开表演食蛋挞及菠萝包，又话好锺意中环，同埋喜欢香港嘅热闹环境、人们为生活而努力嘅感觉，总之好话说尽。嗱，喺呢位世一眼中，香港样样都好，但讲到尾，好可能只系为咗绯闻女朋友马晓晴咋！

呢位马小姐只有25岁，样靓身材正，系香港前花样滑冰代表，有“花滑女神”称号。伊人亦活跃于娱乐圈，先后为港台、TVB、ViuTV、HOY TV担任主持及演出节目，同时拍过不少广告。由于容貌有几分似日本女神石原聪美，因而又有港版石原聪美嘅“花朵”，深受麻甩仔网民喜爱，IG有近18万Followers。

英媒报道，卓林普经常四出比赛，早就唔Enjoy英国嘅生活，长期居于香港同杜拜。邂逅马晓晴后，佢逐渐爱上香港生活，今次移居，应该系取悦佳人之举。哈，近水楼台先得月，梗系要加多两钱肉紧啦。唔知两位体育界嘅顶尖情侣，有冇机会拉埋天窗呢？到时卓林普咪可以做埋香港女婿啰。

点都好，香港近年吸纳嘅所谓国际优才，百分之九十九来自内地，早就被质疑货不对办。如今先后有两位世界级桌球大师加入香港大家庭，证明香港仲有吸引力，总算为低沉嘅市道冲喜，诚属美事。