趙露思深夜被推輪椅送院　突發封鎖社交網恐出事

有「甜寵女神」之稱嘅內地小花趙露思，近日忽然爆出「#趙露思坐輪椅#」熱搜，原來佢深夜被拍到坐輪椅被推入醫院，網傳說佢係被推去急救，網上即瘋傳佢趕急入院嘅多個版本，不過其健康狀態令人擔憂！

有指佢係因為太瘦，疑似營養不良、抵抗力變差，先會搞到入院，加上佢曾表示自己目標體重係70斤（約93磅）。不過亦有粉絲稱，其實趙露思早於14號就喺劇組吸住氧氣拍攝，16號拍完其身體狀況就已經好嚴重，最後身體捱唔住先冇拍，依家嘅坐輪椅照係17號入醫院時所拍，但18號通告單就依然排有有佢戲份嘅安排，唔知點解消息到今日（27日）先被爆出嚟。另外又有指其實趙露思已經有10日冇開工，而傳資本方僅對外表示佢只係感冒。

同時，網友發現趙露思忽然將自己微博鎖咗，即唔可以再睇佢嘅post，粉絲就非常擔心偶像生理及心理狀態，大家都唔知具體發生咩事。而唔少網友都希望露思唔好再瘦，呼籲健康最重要，叫佢唔使焦慮 依家已經夠晒靚女喇。

今日稍後，趙露思工作室終於對事件發出聲明，指趙露思係18號不適後入院，目前正休養中，將暫停後續所有工作：「18日趙露思女士突發身體不適，已第一時間前往醫院接受檢查治療，目前在謹遵醫囑治療休養中。接下來我方將以趙露思女士的身體健康為首要考慮，暫停後續所有工作，也願所有關心露思的人，給她身心休息的空間，謝謝大家的理解體諒。」