娱圈单打︱现身香港好风骚　一王三后唔污糟

正当GD全面回归乐坛之际，昔日BIG BANG队友、臭名远播嘅胜利，一样过得风流快活。最近佢又被人发现喺香港活动，唔止一身街坊装去超市扫货，仲被目击喺中环“一王拖三后”招摇过市。睇个款，胜利依然好风骚喎。

嗱，网民日前喺铜锣湾某超市排队畀钱，赫然发现对面一位戴Cap帽嘅哥仔熟口熟面，望真啲，呢个咪就系胜利！见佢着得非常Casual，面带笑容，体形仲有啲发福，证明喺香港好食好住啦。

果不其然，不旋踵又有网民喺中环见到佢，当时已经系夜晚，佢老哥一拖三、同几位长发短裙女子喺街上拉拉扯扯，非常瞩目。其后佢老哥同其中一条女并排而行，另外两女从后跟上，行到一仆一碌，好不狼狈，但胜利眼尾都冇望一下。网民不禁疑惑，呢位仁兄个名都臭晒啦，点解仲有咁多囡囡送上门呢？

喂，咁讲就唔啱嘞，尽管胜利涉及暴力、贩毒、性侵及贿赂等多宗罪而被判囚一年半，身败名裂，但烂船都有三斤钉，你当BIG BANG个朵流嘅咩？都不知搵落几多啦！何况胜利一直自认有生意头脑，最擅长经营夜店，数月前先至传出佢有意移居香港开夜店，兼喺半山区置业。有钱有女，冇钱冇女，囡囡仆心仆命死跟，一啲都唔出奇。

再讲吖，话晒胜利喺全球都享有高知名度，至今依然有大把囡囡锺意黐埋去。呢，索模贝依霖之前就喺社交网大晒同胜利夜蒲嘅合照，摆明巧威威咁款。所以啫，男人唔坏，女人唔爱。好啦，最后要问，究竟呢个性罪犯、暴力犯、死监趸嚟香港做乜呢？唔好搞搞震喎！