娱圈单打︱片酬凸显地位　今年继续搏杀

今日系元旦，恭祝各位读者百尺竿头，更进一步！好啦，新一年嘅娱乐圈有乜嘢好消息呢？嗱，网上忽然流传一张《爱．回家》薪酬格仔图，揭露各演员每集片酬。登登登櫈，最高人工系“根叔”刘丹！都算系众望所归啦！之不过，有人竟然零片酬做义工！哗，一张格仔图，揭示一众演员喺大台心目中地位，仲好睇过剧集本身！

“根叔”系《爱．回家》男一兼灵魂，丹爷又资深又好戏，每集片酬高达6,000蚊，相信冇人会唔服气。至于加入剧组不久、饰演龙家三房儿子阿Joe嘅何晋乐，薪酬竟然系零，震惊不少网民，随即被讥为返工等于倒贴做义工！喂，鬼叫你冇知名度咩，挨吓先啦世姪！

即系咁，剧中好多女角都深受观众欢迎，例如“大小姐”林淑敏，又如“三太”樊亦敏，但佢哋嘅片酬，统统不及近年先至加入剧组嘅后生女古佩玲！呜呀，“神婆素素”戏份吃重，几乎集集都见到佢，大台力捧到出晒面！人红是非多，包括容颜不断进化兼胶化，网民纷纷质疑素素后台唔简单。

另一令人意外嘅系，饰演“谭道德”嘅甘草演员陈荣峻，单集片酬都有成4,000蚊，比上不足，比下有馀，好过唔少小花小草。外界成日批评大台唔尊重资深演员，观乎呢张格仔图，老一辈人工唔低，不尊重之说似乎不成立。

讲到钱字，必属敏感话题。好似丹爷吖，虽然冇否认自己片酬冠绝全剧，但亦唔承认收呢个价，一于保持神秘感。计本栏话斋，单靠电视台份粮系唔够嘅，参演高收视剧集，无非想开拓更多财路，多啲商演机会啫。