娱圈单打︱推说手滑搵鬼信　男人皆系好此道

大热韩剧《鱿鱼游戏》第二季已经上架，轻易成为全球点击率No.1。第二季加入唔少新角色，包括以《黑暗荣耀》弹起嘅朴成勋。佢今次饰演变性人，一改以往嘅反派演技，演出楚楚可怜边缘人之感，获外界大赞表现出色。殊不知，条友仔唔知系咪赞坏咗，居然喺个人IG上载封面宣传，但唔系自己演出嘅版本，而系日本AV版《鱿鱼游戏》！

事件在当地引发轩然大波，朴成勋秒删封面，并透过经理人公司致歉，表示误将收到嘅私讯公开上传，总之就系一时手滑啫。哈哈哈，当地网民就唔收货，大骂佢狗噏当秘笈，当人傻嘅，根本佢就系深好此道喎。

其实又使乜大惊小怪啫，如果有男人自称唔睇AV，你都唔会信啦。之不过，大韩民国出名封建兼保守，网民个个道德L上身，朴成勋都算唔好彩。嗱，经一事长一智，下次睇AV就唔好再咁手多啦，费事畀人闹之馀，仲畀人笑到面黄啦。

讲番《鱿鱼游戏》第二季，外界评价两极，有人继续力撑，有人就大闹好闷，失去第一季嘅风采！本栏就好持平嘅，睇完头几集后，的确有新不如旧之感，特别系第二季节奏非常拖沓，唔似第一季好快进入状态。男主角李政宰明明烂赌又冇用，老婆走佬，对老母又唔好，点知今季唔止发财立品，仲誓要玩命式查出幕后大波士是谁，都好搵戏嚟做啫。

咁当然，第一季Hit成咁，制作团队讲明睇钱份上，想见好收都唔得。今次除咗加入朴成勋，仲有唔少知名演员参演，包括Big Bang前成员T.O.P。嚟紧仲有第三季㗎，继续边闹边睇啦！