曾比特新一年望搵番下顎線　挑戰魏浚笙顏值

歌手曾比特立心求變，2025年誇下海口無論髮型、身形和音樂上會做多種不同嘗試，加入樂壇不經不覺踏入第5個年度，直言好想有個小改變，爆炸頭髮型一向是他的大標誌，對於髮型上如何變髮？他笑言：「要賣關子先，因為仲未諗到，可以試吓變，依家大家記得曾比特就係爆炸頭，可能我剃咗爆炸頭就唔記得我？好希望可以記得我。」

由去年11月起曾比特便努力做運動，希望改變大家心目中「有肉地」的形象，他說：「唔係特別減肥，希望今年盡少少努力，開一個好頭，搵番失咗蹤嘅下顎線，身形有番啲線條出嚟，挑戰吓Jeffrey（魏浚笙），依家早夜跑步，晚上7點後唔食碳水化合物，不過都食三餐，所以要盡早食完，及唔會食太多。」對於首度推出的國語歌《Talk To Me》播放率高，令他打了一支強心針，預告今年繼續會推出更多國語及廣東歌。