娱圈单打︱一夜登顶擸金奖　局长加持使乜抢

元旦举行嘅《叱咤乐坛流行榜颁奖典礼》经已落幕，赛果例牌惹来大量质疑，当中最叫人意难平系，冯允谦（Jay Fung）不论喺唱作人及男歌手皆失落金奖，输畀“追星局长”罗淑佩最爱嘅陈卓贤（Ian）。喂，论歌曲播放率、作曲量同埋唱功，Jay都有齐冠军相，可惜现实往往令人遗憾。

Jay事后喺社交网撰文，直认有些少失望，但有机会上台唱歌已经好感恩，词恳意切，大方得体，获得网民力撑。比较之下，姜涛攞“我最喜爱的男歌手”发表“我又要畀人闹”感言，就显得有失大体，唔通又怪罪姜糖将佢推上颁奖台？

好啦，讲番Ian，成为当晚最大赢家，难怪罗局长喺台下睇到心心眼冧滋滋，一副如入无人之境嘅模样。之不过，Ian心系轩公，上台攞奖时，细诉轩公两年前送奖鼓励，家阵轮到自己登顶，一于即晚上轩公屋企归还奖座。哗，好一段荡气回肠、情深义重嘅Bromance呀！

网民旋即话，Ian有局长加持，复有轩公宠爱，后台强劲，Jay Fung冇人冇物，点够玩呀！哈，又唔好咁多心，Ian都好努力嘅，旧年密密出歌又开亚博演唱会，只系唱Live未够完美，夜晚好好向轩公请教，一定有进步，畀心机呀。

至于Ian公开感谢轩公，提都冇提天字第一号Hellosss罗局长嘅芳名，唔知罗局长会唔会呷醋呢？大家有眼见，罗局长唔止黑雨都去追星，登上大位后更系扶持有加，启德体育园试场见到佢，除夕倒数见到佢，连元旦都见到佢，无非都系为咗支持偶像啫！咁勤力，孝感动天啦，Ian点会唔感激吖！