蕭正楠相識賴慰玲20年　「神還原」經典廣告勾童年回憶

藝人賴慰玲去年8月在社交網晒身材曲線宣布懷上第二胎，近日她在社交網大晒肚皮，相中以沙灘為背景，她穿上黑色背心型bra top，肚皮已非常巨型，但難得手臂仍然纖幼，而且臉尖尖，認真得天獨厚，她以這輯孕照揮別去年，迎接2025年，並大談身體發生不少變化：「兩個人一個身體的日子，每日都有好多變化同挑戰，真係關關難過關關過，進入最後階段，依然覺得好不可思議，真係好期待好期待抱抱你。」好姊妹蔡思貝留言稱「好大」，並謂也期待抱抱她及BB，黃翠如與陳凱琳都大讚她靚。

另外，賴慰玲與蕭正楠主演的無綫劇《奔跑吧！勇敢的女人們》最近播出，劇中講述兩人20年前已經認識，原來現實中，兩人真的結緣於20年前，賴慰玲在社交網甫上當年合照，並憶述：「係真係20年前，我細細個有幸同Edwin哥哥一齊演出舞台劇，Edwin哥哥當年做嘅鐵郎博士令人印象深刻，仲記得當年演出期間係我會考放榜，好似有科唔合格，我有啲唔開心，Edwin哥哥就請我食咗包薯片，簡直係關心後輩嘅典範！」她稱相隔20年再次合作，笑言：「見到Edwin哥哥將角色演得如油膩有趣，實在令後輩大開眼界。」有份拍攝《奔》劇的吳若希留言謂：「希望年尾投票有得投《2025萬千星輝頒獎典禮最油膩角色獎》」。

在最近播出的《奔跑吧！勇敢的女人們》一集中，講阿蕭為氹劇中小三賴慰玲在垃圾房中向對方大送甜品，最抵死的是阿蕭從垃圾袋中拿出軟雪糕時，竟「神還原」昔日經典廣告動作「𠽌𠽌𠽌」，勾起網民集體回憶的同時，還大讚阿蕭有氣度：「識自嘲，欣賞！」

阿蕭透露這幕是他的構思，並謂由頭到尾都只是希望觀眾看得開心：「我哋想成件事再荒謬啲，就諗住喺個垃圾袋度摷到好多甜品出嚟，當時我就諗畀雪糕佢時可以玩番個gag（𠽌𠽌𠽌），應該會幾好笑，其實我哋一心都係想觀眾睇完套劇會開心笑。事後都有好多Fans Cap番我呢個廣告出嚟畀我，勾起大家嘅回憶都係開心事嚟。」

至於賴慰玲亦大讚阿蕭勁好笑：「我真係估唔到佢咁好笑，有好多次我望住佢做戲，我笑到停唔到，我要佢擰歪面，但係佢擰歪面我又覺得佢擰得好好笑。結果佢真係停咗喺度問到底點先可以幫到我唔笑。」

難得阿蕭相隔逾20年再現經典，無綫官方社交網亦隆重其事，除了播出2003年相關廣告拍攝的探班花絮，還摷回阿蕭2009年在節目中親自回應為何會以這樣的方式拍攝廣告：「真係好多人笑我點解要拍呢個廣告，好多人話：『都唔知你做乜』，直頭畀人話我猥瑣。但喺我角度嚟講，公司收咗客錢，個客想做呢樣嘢，因為咁啱個西餅真係要𠽌住咁去食，所以就教大家𠽌𠽌𠽌咁去食件西餅，我自己睇完都覺得好好笑嘅。」