鬼鬼震撼宣布秘誕B女　另一半成謎疑凍卵後人工受孕

前台灣組合黑澀會成員吳映潔（鬼鬼）曾傳同台灣藝人胡宇威、禾浩辰等人交往，但最後都不了了之分手。今日（10日）佢突然投下震撼彈，35歲嘅佢同時晒出孕婦寫真，並分享BB腳丫照宣布做媽媽，佢表示未來目標係「好好愛你」，言下之意佢生咗B女，稍後又出Post直認：「我沒有結婚，不要再問了。」依舊冇提及孩子爸爸身份，引嚟唔少網友驚訝！

鬼鬼發文道：「讓自己慢下腳步…好好休息，好好孕育，好好兩個心臟一起呼吸著，好好記得這一切，好好感謝自己的勇氣，好好變成一個更勇敢的角色，好好愛妳，好好努力以後的生活，為了我們…」同時感謝所有照顧佢哋嘅人：「這一場美麗又神奇的相遇，2025新角色登場，Welcomemylove。」

鬼鬼的經理人亦證實，鬼鬼同小朋友目前已經平安健康展開兩人新生活，希望外界畀佢哋多啲私人空間：「鬼鬼十分期待2025有更多機會與大家見面」間接表示鬼鬼唔會引退，今年仲有活動要同大家見面，並呼籲：「希望大家能繼續支持全新身份的鬼鬼，再次感謝。」

貼文曝光後隨即炎亞綸、峮峮、鼓鼓等藝人獻上祝福，亦吸引粉絲熱議，除咗恭喜鬼鬼外，更多人關心佢另一半係邊個，有粉絲表示鬼鬼自己曾於節目中公開表示，自己已做凍卵，有講做人工受孕，令粉絲不禁聯想B女疑似冇爸爸，令網友非常驚訝。半年前佢出席公開活動，當時自稱單身嘅佢，僅稱感情空窗已久，完全睇唔出已懷孕。

而同鬼鬼由細識到大、曾傳緋聞嘅王子（邱勝翊）及棒棒堂一眾成員包括敖犬等，即時拍片恭喜鬼鬼做媽咪，仲個個耍手擰頭表示：「不是我的哦！」搞笑祝福好友做人母；炎亞綸稍後亦透過經理人回覆：「一切祝福，最親愛的妹妹實現了她的願望。」