姚焯菲学霸级超高分大学任拣　等住进军港大三甲

“声梦小花”姚焯菲（Chantel）近年一直喺新西兰读书，终于都中学毕业回港，并透露将会留港近9个月，工作即刻排得密密麻麻，除加入处境剧《爱·回家之开心速递》，又积极参与音乐、舞台剧演出。

Chantel去年以“Academic High Distinction”荣誉于奥克兰拔萃女子学校毕业，非常叻女，Chantel自己都好骄傲，又指每科需要平均达到90-100%先拎到“Academic High Distinction”，故佢都感到好惊喜，亦感谢父母栽培，令自己有机会到新西兰读书，体验唔同嘅校园生活。佢指自己最得心应手系经济科，又分享读书心得，叫大家考试时唔好太紧张，平时上堂要留心听书，如果唔系错过老师教导内容就会失去动力温习。Chantel为自己感骄傲，能完成每一个挑战：“好proud of自己可以完成呢个阶段的学业，读书真系好唔容易，考试更加唔容易，过到呢一关我都好戥自己开心。”

另外，Chantel自言渴望到美国升读大学，不过表示如果香港三大大学给予Offer，自己都会考虑留港升学。佢又话对“Entertainment Business and Management”呢科感兴趣，惜该学科为硕士学位，又指若大学读书唔太辛苦嘅话，会想再修读项士学位。虽然Chantel仲未决定去边度升学，但一班“小菲象”都会支持佢，留言大赞女神系学霸。