娛圈單打︱皺皮毒蟲急𢱑撈 承蒙不棄懶得操
2025年02月04日 00:01
東網電視
更多新聞短片

有時候真係唔明,何解有啲明星,明明萬人景仰,身家豐厚,卻偏偏不知自愛,硬係要做埋啲犯法嘅事,將一手好牌打爛。呢,人辦之一,咪就係衰吸毒被判刑、捲入性侵案、被揭唔交稅嘅前東方神起成員朴有天囉!
現年38歲嘅朴有天本來紅極一時,莫講話東方神起貴為第一代韓流天團,風靡全亞洲,即使佢老哥單飛出歌拍劇,一樣大受歡迎,主演韓劇《成均館緋聞》、《屋塔房王世子》全部經典。殊不知,形象忠厚戇直,卻原來非常識食,2016年甚至爆出性侵醜聞,嚇煞粉絲。
雖然性侵案最終咬佢唔入,但桐油埕始終裝桐油,2019年被指控吸毒,佢老哥當時誓神劈願,揚言「若有吸毒就退出演藝圈」,結果不旋踵即被驗出對毒品呈陽性,判監10個月及緩刑,身敗名裂。
之但係你咪理,雖然喺南韓老家再無立足之地,但蔫豬頭都有盲鼻菩薩,朴有天把口就話要引退,實際上繼續四出搵食。嗱,呢個盲鼻菩薩,之唔係日本囉。係呀,東方神起當年喺日本係現象級天團,粉絲直到今日依然死忠,呢條毒蟲衰完番出嚟,頻頻向東瀛粉絲送秋波,大開粉絲見面會吸金。繼去年喺日本推出首張日文專輯及開巡唱後,今年1至2月又有粉絲為佢喺東京鐵塔舉行相片展,佢亦賣晒口乖,大讚日本粉絲長情,令佢好感動喎。
都係嗰句啦,威慣歎慣大使慣,邊有可能歸於平淡,難得承蒙不棄,梗係搏晒老命𢱑撈,搵得幾多得幾多。不過朴有天家陣副尊容真係不敢恭維,又皺又揼,髮線後移,話58歲都有人信。好心啦,搵錢都畀少少誠意吖,收吓身先至出嚟好冇?