VIVA換人巨乳海兒取代加盟?全團爆喊
2025年02月04日 19:01
東網電視
更多新聞短片

女子組合VIVA在上一集的團綜「VIVA Medium Rare House」提到,成員Macy跟經理人吵大鑊被公司「照肺」,於是節目組順水推舟,以事件發酵大整蠱VIVA,跟女高音同門師妹海兒(Hedy)「串謀」,訛稱Hedy將會加入VIVA取代Macy。今次播出的到第九集,起初VIVA還情教Hedy跳舞、Hedy教VIVA唱歌,大家相處融洽,後來Hedy故作欲言又止地問VIVA最近是否有所變動,又指自己近日突然收到指示:「聽講好似有人唔乖,但我唔知係邊個…… 總之我依家好似要食咗一個位……」這時VIVA問到:「呢啲內容係咪唔出得街㗎?」節目組佯裝只收到這次是拍攝「Hedy一日限定女團」的內容,隨後五人拍攝ending後,VIVA便回到宿舍。
收到突如其來的「成員變動」消息,VIVA坦言很衝擊:「因為原本我哋今日係拍攝同Hedy玩一日,但突然間收到呢個資訊,個感覺好奇怪、好衝擊。可能係佢講嘅一啲嘢,令到我哋知道我哋近排係發生過一啲嘢。」節目組問到底發生過甚麼事?VALC首先自首:「我入嚟住頭一個禮拜返咗兩次屋企,有申請嘅。」Macy接着說:「我申請返屋企,但係唔畀,我覺得不合乎情理,同我真係住得遠,我申請係想返去拎嘢,但係被駁回,我就好嬲,鬧人嗰個係我。本身我唔係鬧經理人,我鬧嘅嘢係覺得溝通上有不當,同埋當時有啲處理不當。」
提到Hedy有可能取代其中一位成員位置,Macy邊喊邊說:「做錯嘢嗰個係我,將件事鬧得最大嗰個係我,所以如果呢個係我應該要負嘅責任,我ok。」問到如果Macy真的被退團會怎樣,Ada跟VALC苦笑道:「咁不如一齊被out啦,咁不如算啦!」拍攝途中,Hedy突然再次現身宿舍,原來要自爆:「我頭先有冇露饀呀?我其實唔係好做到,好難,要特登令一個人痛苦或者擔心。」經理人指Carina最傷心,因為整個過程都沒有說話,這時Carina終於忍不住爆喊:「我真係好傷心㗎!呢啲嘢唔可以攞嚟玩㗎!大佬……」網民亦紛紛留言大讚Carina有做隊長潛質,為團隊顧全大局:「真係一個好重情義嘅女仔。」、「佢真係好珍惜組團嘅機會。」、「好努力圍埋大家。」
經過今次大整蠱後,Macy坦言跟團隊、公司及經理人有更好的溝通:「之前可能唔會太直接或者太敢講自己嘅諗法,所以會有誤會,或者溝通上出現咗問題,但經過今次件事,大家有乜嘢問題都會直接講,再睇睇點解決,同埋團隊感情的而且確好咗好多。」