古天樂賀歲片票房直逼千萬　伍允龍演「娘娘腔」想伸自己一腳

賀歲電影《臨時決鬥》自年廿九（28/1)上映至今，票房直逼千萬，多位演員先後出動謝票，包括王丹妮、張文傑、喬靖夫、王頌恩、陳獻略及導演麥啟光等，主創團隊於本周會空群出動謝票場跟觀眾互動見面，當中包括古天樂、王丹妮、周秀娜、胡子彤和陳湛文。

在戲中有耀眼造型，驚喜演出王十的伍允龍，被古天樂喻為造型似Michael Jackson，塗上指甲油演出娘娘腔，似瘋乍癲，但動作靈活，更與古天樂(古仔)有埋身動作攬抱互動，氣得古仔要動手轟開，2人在拍攝前認真對戲，排練動作，伍允龍多次彈飛撻落地，毫不錫身，伍允龍笑言見到自己娘娘腔黏著古仔，也想伸自己一腳，對於是次造型突出，他表示：「我咁大個仔第一次塗指甲油，我還以為可以用番梘洗得甩，原來要用洗甲水擦甩，造型幾靚，下次試吓塗綠色應該幾好睇。」