黃庭鋒首當男一壓力爆煲 林可悅首拍床戲印象難忘

2025年02月05日 19:01
東網電視
更多新聞短片
無綫劇《富貴千團》進入結局周,在英國斯陶爾布里奇Old Swinford Hospital School 及古城巴斯 Kingswood School唸書的黃庭鋒,是次扮演大學科研生「哈利」入型入格,之前在台上發表「一滴血」計劃時便大晒流利英語。對於庭鋒首擔大旗任男主角,網民大表支持留言正評:「黃庭鋒真係靚仔樣又識多國語言」、「佢好適合做本地大學生,年輕start up 呢類角色」。談到首部擔正男一,庭鋒受訪時坦言緊張到手震:「我嗰時攞住個劇本手都震埋呀,我記得嗰日上去監製房傾故仔,我好奇點解個故仔係圍住我嘅?我就問其實我要做啲咩?監製先至話:『其實你係男主角』,嗰刻係有少少震,但又要扮到好冷靜。」
為了做好角色,庭鋒透露事前狂煲《華爾街狼人》取經,又謂開工第一日即要拍攝爆喊戲壓力相當大:「現場有成廿幾個工作人員等緊你喊,嗰個壓力真係好大。我記得我坐咗喺度好耐,但完全放鬆唔到,心入面又好care其他人點諗我,好大件事。其實我早一日就有醞釀,諗咗好多唔開心嘅嘢。(要練埋喊得靚仔啲?)管理唔到個樣喇!要管咗個情緒先。」他又指因首度與湯洛雯(靚湯)合作,故拍攝前都會擔心火花及默契問題,合作過後就發現靚湯私下好幽默、好搞笑,笑言比男仔更加放。
前晚(3日)一集黃嘉樂與拜金小三Angel(林可悅)的床戲亦惹起不少關注,一開場已展現超強柔軟度吸引眼球的Angela、以超性感bra top與嘉樂上演的床戲,更將其完美身材表露無遺,非常吸睛。林可悅曾留學美國,2016年參加紐約華裔小姐,並獲得「最佳旗袍演繹」及「友誼小姐」,同屆冠軍為余思霆。回港後先後於2018及19年兩度參選港姐,惜未能入圍,但被看中安排入讀藝訓班,原來林可悅自小立志做演員,為了在電視台拍劇,不介意演路人甲乙角色,豪言在《愛.回家之開心速遞》中,演過近30個角色之多。
談到是次床戲,林可悅受訪時表示拍攝前十分緊張:「因為係第一次拍床戲,拍攝當日仲要係第一次同嘉樂真人見面,就已經要攬住喺床上面試戲。拍攝嘅時候嘉樂勁專業,一次NG都冇,而且只要一cut機,我哋兩個都會即刻分開,一開機先黐番埋一齊,所以拍嗰陣一直係咁分開、黐埋,分開、黐埋。嘉樂成個過程都好gentlemen、好nice,完全冇令我尷尬,有咗今次經驗,我以後拍床戲應該都唔會太驚。」