东网电视
更多新闻短片
都话女人最棹忌畀人话老，为咗延续青春，倾家荡产又医美又整容在所不计。之不过，亦有美女系例外。好似已移居新西兰嘅唐宁，43岁当然唔算青春，但要Keep住童颜亦非不可能。偏偏伊人唔介意外表，近日一改形象，以一头银灰短发、粗犷爆肌形象现身，成为谈论焦点。有网民大赞佢有型，但亦有人弹佢变成苍老大叔。
伊人一于少理。佢解释系刻意将头发染成银灰色，自细已有好多白头发，与其为此烦恼，不如将成个头染浅。至于突然操肌变身筋肉人，系因为去年接触跑步及重量训练，非常着迷，今年决定操Fit参赛。总之，佢自觉活到呢把年纪，随心所欲最重要，已经唔介意外人目光。
忽然变成白毛女又点止唐宁。90年代红极一时嘅台湾女星吴倩莲，结婚生仔之后淡出娱乐圈已有一段长时间，而佢又真系做到由璀璨归于平淡，一直神隐。不过，近日小倩终于被网民野生捕获，一头长白发令人大吃一惊，但细看之下，56岁嘅佢脸部轮廓依旧清秀，完全纯天然模样。既然唔再食娱乐圈呢口饭，自然老去又有乜所谓。
再数落去，年纪较长嘅叶茜文、叶童，现在亦系以一头银白发示人，一样获赞老得有型。又的确冇夸张，睇吓Sally，不经不觉已经63岁，依然唱得跳得。年轻时性感迷人，人见人爱；年长时优雅自信，又系另一番吸引力。
所以话啫，乜嘢年纪都好，做人最紧要有自信。当一个女人有番咁上下阅历，知道自己追求嘅系乜嘢生活，身心健康更胜堆砌得来嘅外壳，又何需理会塘边鹤嘅无理批评！
唐宁（右）、吴倩莲与叶茜文未有刻意掩盖岁月痕迹。
