东网电视
更多新闻短片
最近南韩娱乐圈可谓非常湿滞，包括韩流男神金秀贤人设大翻车、以零负评见称嘅刘延锡逃税、长腿Oppa李敏镐新剧收视仆直等。嗱，男星全部炒晒，怕且女星好啲啩？系就系冇咁多负皮，但过去一直系票房灵丹嘅一线女星，受欢迎程度同样直线下降。
好似BLACK PINK最省镜嘅Jisoo吖，两年前一曲《Flower》唱到街知巷闻，“开花舞”连家燕姐都跟住跳，点知最近推出全新单曲《Earthquake》反应大为逊色，唔好话流行程度冇得同好姊妹Rosé嘅《APT.》挥，评价亦远远不如Jennie及Lisa嘅新歌。
衰开有条路，Jisoo主演新剧《流感》，演技再次备受批评，当地观众斥为烂到惨不忍睹，有冇咁夸张呀？唔知系咪受连串负皮所累，本月底喺香港举行嘅两场见面会，门票销情并不理想。本月初开售至今，仍有十连位可拣，甚至传出要搵“顶流”姜涛做嘉宾救亡。
唔系啩？过去K-Pop明星在港开演唱会或见面会，例必一票难求，何解Jisoo咁失威？鬼咩，睇吓门票价格，最贵索价近2,000蚊，由于只系见面会而非演唱会规模，除咗铁粉肯埋单，理性消费者莫不觉得物非所值。
例如旧年另一成员Lisa来港开见面会，全程只有80分钟，唱5首歌咁大把，被轰为呃钱，结果连黄牛都炒燶。再讲吖，今时今日经济不景，大家追星都会就住就住，加上韩星丑闻太多，整体形象大跌，吸引力大不如前。Jisoo日前喺马尼拉见面会就大演亲民骚，凼到粉丝好开心，可能想借此挽救其他场次嘅票房啦。
Jisoo演技被弹，新歌又反应平平，点算呢？
