东网电视
更多新闻短片
奥斯卡金像奖是众多电影人梦寐以求的奖座，不过唔系个个巨星攞完奥斯卡都珍而重之，相反有好多奥斯卡得主将个“小金人”奖座周围放，有啲遗失咗之外更有啲放喺屋企厕所！
雅丽茜亚将“小金人”交朋友看管。
雅丽茜亚维嘉达畀朋友看管
瑞典女星雅丽茜亚维嘉达（Alicia Vikander）2016年凭电影《丹麦女孩》（The Danish Girl）“一击即中”勇夺奥斯卡最佳女配角，佢曾自爆拎完奖之后一日就已经冇再见个“小金人”。佢解释话因为搬新屋而佢又经常出外拍戏所以将个“小金人”畀咗朋友保管，而佢朋友个女负责好好保管个奖一直都有send相畀佢等佢知道个奖座一直完整无缺。
古巴高汀另类方式将“小金人”保鲜。
古巴高汀将“小金人”当酒咁存放
美国男星古巴高汀（Cuba Gooding Jr）1997年凭《甜心先生》（Jerry Maguire）爆大冷夺奥斯卡最佳男配角，当年佢获奖一刻激烈领奖，相信大家仍然记忆犹新。佢曾自爆个奖一直放喺旧屋长达6年，佢话特登放喺旧屋个酒柜入面，因为贪佢有温度控制可以令个“小金人”一直都可以“保鲜”。
爱玛汤逊两夺奥斯卡。
影后爱放“小金人”入厕所
英国女星爱玛汤逊（Emma Thompson）先后凭《此情可问天》（Howards End）同《傲慢与偏见》（Sense & Sensibility）两夺奥斯卡，根据曾同佢合作嘅男星Henry Golding爆料指有次去爱玛家时发现佢竟然将两座“小金人”放喺厕所入面。
琦受爱玛启发将“小金人”放喺“私人空间”内。
唔知系咪受爱玛启发，同佢喺《傲》合作过嘅英国女星琦温斯莉（Kate Winslet）亦将佢2009年嘅奥斯卡影后宝座放喺厕所入面！不过原来佢咁做系为咗“宾客”着想：“最佳摆放位置系厕所内，等所有人入去开大或开细时，佢哋可以利用时间对住个镜拎起个奖座扮自己攞讲得奖感受。我会知道嘅，因为佢哋每次冲完厕都等多5分钟先出嚟。”
苏珊公开“小金人”摆放位置。
至于美国女星苏珊莎朗顿（Susan Sarandon）亦将奥斯卡“小金人”放喺厕所内，所谓“有图有真相”，佢更唔介意畀人知公开过“小金人”位置嘅照片。照片中见到佢成个厕所内都摆放佢得到嘅奖同挂满晒证书。
妮妲莉遗失“小金人”。
妮妲莉宝文“小金人”唔见咗
美国女星妮妲莉宝文（Natalie Portman）2011年凭《黑天鹅》（Black Swan）夺奥斯卡金像影后，虽然难得攞奥斯卡，但佢曾自爆个奖“下落不明”！佢自认唔知放咗个“小金人”喺边：“可能喺夹万定系其他地方，我唔知喺边？！总之我已冇见（小金人）一排。”而佢亦不忘狂“踩”奥斯卡：“我曾经睇过一啲书叫人唔好崇拜虚假偶像。嗰个（小金人）基本上系金色嘅男人，系崇拜紧金色偶像。所以点解我唔将佢钉喺墙上。因为系虚假嘅偶像。”
