东网电视
更多新闻短片
新版《白雪公主》开画票房被睇淡，咁又难怪，套戏未上画先畀人插到飞起，Rachel Zegler做白雪公主同Gal Gadot做皇后呢个casting已经够晒争议。
Rachel同原著“皮肤白过雪”完全唔夹唔在讲，仲要佢天生寸嘴，话原著故事老土兼过时，搞到连王子救公主嘅情节都冇埋，仲话公主唔需要男人救，要独立自强，喂，咁不如你作个新故事“黑雪公主”吖笨。
即使Rachel后来宣传时知道众怒难犯，转軚话好荣幸可以演白雪公主，又话所有后生女都梦想接到呢个角色，但点补飞都冇用啦，网民已经唔buy。
至于Gal做皇后，本来佢个样够晒霸气，做反派应该几有睇头，问题系佢同Rachel睇落似姊妹多过似母女，令人好出戏，佢又话要重新定义皇后呢个角色系“复杂嘅女性”，咪玩啦，皇后就系要奸到出汁先好睇㗎，你搞到佢“复杂”晒，仲有咩睇头？
总之呢，荷里活依家成日将“觉醒文化”强加落去，搞到啲戏变晒四不像，例如原本红发白皮肤嘅小鱼仙变咗黑人Halle Bailey，仲恶人先告状话你哋唔接受就系haters就系种族歧视，结果全球票房死过腊肉，求仁得仁啰。难怪特朗普都顶唔顺，当选后第一时间唔系要摆平俄乌战争，而系要令荷里活再次伟大，即刻搵咗史泰龙、米路吉逊做荷里活特使，声称将过去4年流失嘅海外生意抢番嚟。
事实上，侵侵管治班子个个俊男美女，最养眼省镜莫过于年仅27岁嘅金发美女白宫发言人Karoline Leavitt啦，睇现实版白宫群英，好过睇荷里活《白宫群英》啦，系咪！
Rachel（右图左）与Gal的配搭，令《白雪公主》在上画前已引来负评。
