东网电视
更多新闻短片
香港娱乐圈有两个叫阿恒嘅衰仔零舍麻烦，一个系被嘲“饿死老婆瘟臭屋”嘅张致恒，另一个就系有打老婆前科嘅周永恒。嗱，咪以为后者沉寂一时修心养性，错！日前佢老哥喺天水围行人路违规使用“风火轮”被捕，期间情绪激动，仲闹上新闻版面添！
周永恒被捕后公开露面，展示手上伤势，似乎想话畀大家听，执法人员好粗暴。开讲都有话：“你唔喺现场出现咪冇事啰”，风火轮喺香港公众地方使用属违法，何况嗰度仲系行人路，横冲直撞乱咁嚟，一阵撞伤阿婆、扫低细路咪大镬？所以啫，畀人拉系抵死㗎。
咁佢今次都叫做肯道歉。周永恒话喎，踩风火轮系因为要送外卖，近年转行做外卖员搵钱养仔，依家手部受伤，暂时送唔到外卖，嚟紧会继续做歌同埋学剪头发。之不过，若然伤咗手送唔到外卖，何解又剪到头发呢？
Anyway，本栏就觉得人谁无过，难得佢放下明星光环，走去做外卖仔养家，都唔系容易。但都要提醒一句，送外卖亦要守法，冇电单车牌就踩单车算罢啦。比较之下，另一“恒”张致恒动辄喺网上呻穷，伸大手板向网民众筹乞钱，似乎仲难睇少少。
之但系，张致恒点衰都好，又冇好似周永恒咁，衰到郁手打老婆喎。周永恒被指家暴前妻赵颂茹，最终搞到离婚；再婚第二任内地妻子陈薇，又被爆出言恐吓斩死老婆兼袭警，然后又声称自己畀老婆家暴先至系受害者，非常泶嫪。再加上曾经藏毒被判罪成，前科厚过电话簿。好啦，究竟两个“恒”边个衰啲，本栏好难评断，宣告打和啦！
张致恒（左）与周永恒形象负面，神憎鬼厌。
