东网电视
更多新闻短片
无綫剧集《夺命提示》疯狂大洒盐花，成功引爆话题，刘颖镟（Tiffany）与郭柏妍（Rosita）为咗查案，组成女团Double C，先后以猫女郎、白色晚装、娇俏空姐、啦啦队、女仆水着、霸气皮背心、瑜伽及“伪出浴Look”8大造型亮相，愈着愈少布，睇到麻甩仔心心眼！
妹仔大过主人婆，两女搏命骚Quali，观众醉翁之意不在酒，集中喺抛胸露腰大长腿，究竟剧情好唔好睇，似乎冇乜人提。亦有部分道德L批评教坏细路，话拍到AV咁款，结果又招来好色之徒质问：你究竟有冇睇过AV㗎？
呢股盐花风潮，甚至引来前港姐亚军王卓淇出口，直指女艺人喺公开场合着咁少布唔系咁好，大台应该保护女艺人，仲以自己经历为例，当年为咗宣传剧集，着咗一条较短嘅裙裤，点知被拍成超近镜特写双腿嘅短片放上网。
唉，阿女，今时唔同往日啦。大台剧集收视每况愈下，唔卖肉，恐怕更加冇Noise！再讲吖，家阵啲女艺人个个都好醒目，识得做足防走光措施。呢，Tiffany同Rosita都对剧中造型好满意，亦开心获得咁大回响，所以啫，担心只系多馀。
《夺》剧造就咗Double C上位，两女日后仲可以拍住上卖广告或登台，咁又开多一条财路，爽！话时话，家阵真系好兴呢类GL剧Feel嘅孖妹组合，好似泰剧《我们的秘密》，两位女主角邝玲玲同Orm组成“LingOrm CP”，不停掘金，下个月又嚟香港举行FM，仲话票价炒上过万元一张，认真和味！大台不妨照Dup吖！
“LingOrm CP”（右图）近期大受欢迎。（左图：郭柏妍、刘颖镟）
