《奪命提示》晒瞓覺相夠癲　丁子朗反白眼

由視帝陳山聰、張振朗、丁子朗、劉穎鏇、劉佩玥、郭柏妍等主演嘅無綫熱播劇《奪命提示》，收視高企有晒話題性，估唔到佢哋一班拍完都仲咁好默契，尋日（15日）就齊齊上載自己黑圖，喺片場瞓着嘅「靚相」，仲要個個唔同款，睇到網友好過癮。

當中陳山聰、劉佩玥、張振朗就繼續靚仔靚女，點瞓都咁靚，陳山聰更係型到好似影雜誌封面咁，真係天生麗質難自棄，並留言：「雖然我手頭上有齊晒ASIB咁多位要員嘅瞓覺相，但係我唔會咁衰仔出賣手足，所以我 依家自爆先！托住頭都瞓得着，我係咪勁先？！」劉佩玥就留言：「作為姜姐，區區瞓覺樣又點會打擊到我呀郭柏飛！同埋我都瞓得好有儀態吖😂😂😂特別鳴謝陳山聰 出賣小姜，我以為我瞓緊你都瞓緊！點知⚠️⚠️😂😂😂😂😂」張振朗則自知Chok樣冇得輸，留言自嘲：「識瞓一定係gel晒頭，着哂皮褸，或者着禮服瞓覺，咁係呢個世界就冇人可以影到我樣衰嘅瞓覺相😎！」

相反丁子朗、劉穎鏇、郭柏妍就各有各睡相，當中劉穎鏇露齒瞓：「其實… 我真係好怕凍㗎! 🫣🥶❄️😴」；丁子朗更係誇張到反晒白眼，睇到網友驚驚，不過佢就好自豪，又留言爆料張相係出自陳山聰手筆：「郭長官，呢張就係我最引以為榮嘅「睡相」!」。郭柏妍天生神力可以企喺度瞓，仲秧言想挑戰丁子朗：「丁丁擘大眼都瞓得着，而我…就企喺度都瞓得着，ASIB係Sleeping Everywhere！Julie係咩周公嚟㗎？🙈」，夠晒搞笑。

不過搞笑還搞笑，郭柏妍的企棟棟睡姿背後原來有段古，而且更相當專業。事緣郭柏妍當日原來發高燒，但與韓馬利一樣因不想影響劇組拍攝進度，郭柏妍一直沒有說出自己發燒實情，就連監製 Jazz 也是最近才知道 Rosita 當日頂著高燒拍攝。

對此，郭柏妍訪問時，憶述當時情況真的蠻辛苦，幸獲劇組貼心照顧：「嗰時都病得好緊要，同埋發好高燒，但因為嗰時啲Rundown已經排晒，我見到我當日要拍嗰場被綁架戲又涉及好多唔同嘅工作單位，如果甩咗呢場我怕會浪費好多人力物力，所以我都頂硬上，希望可以順利完成。劇組好好，喺唔需要我嘅場口都畀我休息，瞓一瞓好好多。」另照片所見，郭柏妍的美腿還布滿蚊赧，原來她之前在南生圍拍攝重頭打鬥場面時，被蚊咬到一腳都是，認真我見猶憐。