羅志祥時隔8年再戰大銀幕　加入猛片衝金馬獎

台灣舞王羅志祥上月底自曝媽媽罹患阿茲海默症已2、3年，令外界心疼不已，佢亦努力工作賺醫藥費，近日就見佢現身台灣《角頭》系列電影班底嘅新片圍讀，似乎佢將時隔8年後再戰大銀幕。電影《角頭》出品人張威縯（宏哥）上載合照，見台灣藝人王識賢、懷秋、白吉勝等人一齊讀本嘅相，仲有新女詹子萱加入，似為《角頭》班底打造新片。

《角頭》系列電影喺台灣一直大受歡迎，去年推出新作《角頭—大橋頭》票房更衝至2.24億新台幣（約5,300萬港元），施名帥去年更一舉拿下金馬獎「最佳男配角」。據悉，羅志祥演出嘅電影係《角頭》監製張威縯仔女共同出品嘅《我的網紅女兒》，集結親情、黑幫、網紅等元素，打造同《角頭》唔同嘅題材，新片隨時衝金馬獎獎項。

該電影劇情，描述黑道大哥王識賢要出獄後想洗白享天倫，同網紅女兒詹子萱重新展開生活，卻碰上想喺江湖占有一席之地嘅饒舌歌手對女兒熱烈追求，有唔少喜劇元素穿插其中。