網民熱話：樓價租金貴　網民倡議住迷你倉

樓價貴，香港人就愈住愈細，100、200方呎的迷你戶都已經算係「安樂窩」。迷你戶都得，咁迷你倉又接唔接受到呢？近日討論區有網民開帖，研究住迷你倉的可行性，聲稱「月租約1,000，放得落6呎床，個別倉有衞浴設施，部分有24小時冷氣」，認為「有得諗」，結果當然惹來網民「圍插」啦。小記都想問，如果住迷你倉都得，咁去紅磡某啲舖頭度租住副...又得唔得？

雖然有人偷偷住迷你倉的怪現象，久不久就有所聞，但對於發帖者的「異想天開」，仍有網民就開「認真Mode」來抨擊一番，有人指「咁細...」，又有人「啲空氣會唔會好差咁呀? 」，又擔心「火燭隨時變燒豬...」不過，發帖者一心要推銷自己的idea，所以都一一駁斥，指「放得落6呎床，仲細？」「空調喎，點會差？」「邊到唔會火燭？」人哋唔係話邊度唔會火燭，而係擔心火燭時逃生有困難呀，聰明仔！

有人則點出問題癥結，認為要人住迷你倉「好陰功囉！」有網民更覺得慘過住劏房，指「既然住一格床都接受到，不如兩個朋友Share劏房上下格床...」不過，發帖者就死撐不停，斷言迷你倉「環境一定好過劏房」。可惜，網民唔太Buy，認為「有頭髮邊個想做瘌痢」，直言「有得揀邊個會做啲咁嘅嘢？」

當大家都「圍插」發帖者的「住迷你倉」構思時，有「萬能」網民隨即現身附和發帖者，稱「而家啲迷你倉分分鐘靚過你屋企」，還公開住迷你倉的「秘技」，住戶「係要晚出早歸」，因為「大廈未必24小時開放，係正常時間出入冇人懷疑，但晚晚都夜返看更實問...」唉，小記只能說，就算樓價租金有幾貴，人始終是有尊嚴的，何必把自己當係貨咁擺入倉呢？