80後「廢青」變財俊　豪購千萬村屋贈雙親

一個曾經以吃喝玩樂為目標、返工覺無聊就辭職、褲袋裏曾餘下只有20美元的80後。今天，他已經成為年薪逾600萬元的證券行副總裁，兩個月前更買入上水一幢1,400萬元丁屋送贈父母，讓他們早點享受生活，自己則繼續租住私人物業。如今背負700萬的供款他不畏高，更計劃下年為個人自置物業。

現年33歲的黃嘉俊為中國北方證券副總裁，兩個月前決定動用700萬積蓄（佔身家七成半）作為首期，買入位於上水坑頭村一幢樓高三層的丁屋，每層建築面積700呎，總面積2,100呎，另連700呎天台及2,000呎花園。

雖然未正式入伙，惟甫入大宅已經是千呎花園，當中更設一個游泳池，晚上睡在池邊欣賞滿天繁星甚為寫意。丁屋每層則以兩房間隔，全為套房設計，主人套房面積寬敞。天台環境清幽，閒時可用作朋友聚會及燒烤場地。丁屋以1,400萬元成交，買入包括該幅住宅地及丁權。

首個上車物業已經是千萬住宅，黃嘉俊出手看似非常豪爽，惟實情是想父母安享晚年。「我由小到大都係上水古洞生活，但最近因為新界東北發展而要搬遷。由於父母習慣上水村屋的居住環境，而自己計過數又應付到，所以咪買咗丁屋畀父母及妹妹住。因為地方偏僻關係，自己現租住九龍站天璽800呎單位，周末才會返上水。」丁屋月供約4萬元，另個人物業每月租金4萬元，黃嘉俊每月物業供款合共達8萬元。

黃嘉俊的成功，背後經歷過一番脫變。當年十七歲的他隨父母移民美國。由於父母不適應當地生活，最後決定回流香港，他則繼續在當地修讀市場學及電影學。在「無王管」下，他過着自由的生活，「當時我係半工讀，做過餐廳侍應、洗碗等，由於對讀書無興趣，所以返工仲多過讀書，不過最後都順利畢業。」

畢業後，他曾擔任戲院經理，惟對工作感厭倦，就辭職過着頹廢生活。「人有時係懶，後生仔返工返咗一段時間，唔想做野，想Take A Break，咁咪Take A Break。我唔返工幾個月，到最後剩低20美元。」及後他創立網上生意，出售藝術電影影音光碟，每年生意額達100至200萬元。生意雖有起色，他卻毅然決定放棄，回流香港重新開始。「我覺得做網上商店有限制，好容易畀人代替，故決定返香港。當時我戶口得返2,000元，之前所賺的錢都畀我使得一乾二淨。」

身無分文回港，曾做過時裝採購及戲院經理，最後轉職做證券行市場經理。「2011年金融界的氣氛好差，我決定最差的時候入行，因為少競爭，而且當經濟復甦就會有更好的前景。」當年對金融業零認識的他在工作上遇到不少挫折，「我發現行內有太多叻人，自己有好多野唔識，不停從錯誤中學習，而且我不停睇書、睇報紙，不少股評人都是我的『師父』。」

自薦轉職為分析員

2012年開始，港股投資氣氛改善，黃嘉俊的公司需要人才擔任股票分析員，準備多時的他終等到一個機會，自薦轉職為股票分析員。上場後他更鍥而不捨地學習，進行個股研究、分析數據，約見不同客戶、證券商及上市公司，為不少機構投資者、上市公司進行買賣。結果，在2014年他的佣金收入更突破500萬元。

由戲院經理做到證券行副總裁，由「一個仙」都無做到年薪數百萬，黃嘉俊的經歷可能你會覺得是僥倖。惟他認為，「買唔到樓的人只係未諗到方法，我唔覺得自己係例外。有冇機會好重要，但更重要係識唔識把握機會，完全唔係因為我好彩先有今日成就。」

黃嘉俊主力研究細價股，被視為新進細價股專家。他指，「以兩億市值的細價股為例，佢輸極都有限，但可以突然升五倍，去到十億市值，爆炸力好大。」

不過，礙於角色衝突，他從來不會投資細價股，只會大注買入藍籌股。近期的股市大時代，當然令他有不少斬獲，亦助他提早完成置業夢。

「淨係隻港交所(00388)都賺咗成倍，個人賺咗約70萬。買前身的和記黃埔亦有斬獲。大市好，令我個人投資升值至200到300萬。另外，佣金收入亦明顯增加，故加快置業步伐。」

不過，人總有失手的時候。就如早前由於市況不明朗，黃嘉俊為客戶投資的中建置地(00261)大跌逾20%，最後要沽貨止蝕。「股票有時預計唔到，一旦出現大跌，就要同個客講止蝕。就好似今次蝕咗20萬，不過由於客人總投資額有2,000萬，只要其他股票的升幅補到個股跌幅就可以了。」