網民熱話：冇樓人士7大特徵？

香港人日日都講買樓，你又知唔知你身邊嘅同事、朋友有冇樓呢？有網民就喺討論區開post，聲稱係分析冇樓人士7大特徵喎，分別係：1、居無定處；2、返工大過天；3、開口埋口話樓價高；4、同枱食飯一講買樓就轉移話題；5、講唔出而加供樓幾多厘息；6、講唔出而家嘅CCL；7、唔知好多世界大事等等。吓，點解好似講到啲特徵咁負面咁嘅？究竟真係咁，定係有樓網民喺度自high呢可？

討論區內又嚟玩分化，網民當然起晒哄啦。好多聲稱有樓嘅網民就現身說法，不過都唔係個個都buy發帖者，有人就話「有十間八間收租樓嘅人身家豐厚，每星期CCL嗰少少變化，佢哋點會咁清楚...」咁又係喎，唔跌番五、六成佢哋都懶理咁多啦！租就照收！

又有網民話發帖者講嘅特徵唔多準喎，「我老闆都講唔出第5點同第6點係咩喎，但佢有車有樓有遊艇，樣樣都係Full pay...」真係睇到小編都葡萄埋一份，Full pay仲點使理佢息口幾多喎！

有網民就幫手諗多幾個特徵，例如「以為樓契係一張紙」、「經過地產舖會陰陰嘴笑」等等喎，原來咁多特徵咩？只能講句：「世事都讓你看透！」

平心而論，呢7樣所謂嘅特徵，其實亦可以係有樓人士嘅特徵，例如「開口埋口話樓價高」，可以係本身有樓，想睇準時機入多層樓；「居無定處」可以係年年換樓，住完一層又一層。有啲嘢，調番轉嚟講又得啫，得咗！小編突然都覺得自己真係好聰明囉！

─ ─ ─ ─ ─ ─ ─ ─ ─ ─ ─ ─

「東網Money18」fb專頁：有討論、有分析，齊來FUN享，贏盡●你Like