m18講場：御藥堂轉板　冧巴與紀念品有玄機

2003年一場沙士，令大家見識都港人嘅勇敢、醫護人員嘅無私，仲有傳媒嘅拚搏。好多嘢平常唔覺唔覺，但日子愈黑暗，就愈見到人性光輝；愈係危機，就愈係機會。御藥堂(00932)就係當年賣板藍根，危機中發圍。

佢哋主席陳恩德(Mark)話，公司係佢位依家80幾歲嘅爸爸同Mark妹妹喺2002年開嘅，Mark自己當時雖然喺同行做，但仲係學緊嘢嘅階段，所以就未返公司幫手。佢話當時公司規模好細，投資幾十萬開設。

到2003年沙士，初期傳聞話板藍根可以醫到，所以當時公司啲板藍根貨去得好快，要24小時搵貨源畀連鎖零售商，忙到要喺公司瞓。雖然最後證實板藍根對付唔到沙士，不過都令佢哋做咗好多生意，令公司規模壯大。

公司周四由創業板轉至主板上市。Mark話以前創業板個上市冧巴「08185」係抽嘅，冇權揀；依家主板個上市冧巴「00932」係自己揀嘅，係「搞生意」咁解。

周五佢哋送咗個放大N倍嘅冬蟲草紀念品畀港交所(00388)。喂，嗰陣創業板上市時，咪已經送過一次囉？Mark話，上創業板時送嘅，係蝙蝠蛾科幼蟲「進化中」未完成嘅冬蟲草，尋日轉主板送嗰條係「進化完成」嘅冬蟲草。原來唔同嘅。

─ ─ ─ ─ ─ ─ ─ ─ ─ ─

又到交稅季節，點先可以輕輕鬆鬆，安享悠閒「稅」月？想要着數即刻入嚟睇http://bit.ly/20ToU3P