m18講場：會計師做上市公司高層最高薪有幾錢？

會計師公會今年7至8月做咗個會員調查，發現喺上市公司做高級管理層或董事嘅公會會員人工都幾和味！喺調查入面，最高薪嗰位年賺5,100萬元。當除開12個月計，即是月入425萬元架！

年賺5,100萬元嗰位係邊位？調查當然唔會玩開名。不過，會計師公會行政總裁丁偉銓就估計，呢位打工皇帝可能已經唔係財務總監，而係CEO(行政總裁)！

調查仲發現，當中23%喺上市公司擁有過百萬元年薪，同時，87%在港上市公司都有佢哋公會會員做公司高層或董事局成員。咁即係？即係足以證明會計師喺本港資本市場有好大影響力咁囉。

成日聽到啲會計師呻工時長、仲要成日返內地出差舟車勞頓，但無論幾咁辛苦，一睇番佢哋份糧，就肯定大把人仍想加入呢行。

睇番公會舊年11月至12月做嘅調查，有39%會員年薪有60萬元或以上(除開即是月入5萬元或以上)，年薪達60萬元至近90萬元(除開即是月入5萬至7.5萬元)嘅就有20%，年薪多過240萬元(除開即是月入多過20萬元)嘅都有2%。就算年薪少過60萬元(除開即是月入少過5萬元)嘅「低薪一族」(相對嚟講咋)，都有好大部分年薪介乎30萬元至近60萬元(即是月入2.5萬元至5萬元)，難怪每年咁多人爭崩頭報讀大學會計系！

丁偉銓仲話，會計師可以涉獵好多行業，差唔多乜行業都可以做，就連特首都可以做！係喎，澳門前特首何厚鏵咪就係有會計師資格囉，眾所周知嘅喎，乜你唔知咩。

─ ─ ─ ─ ─ ─ ─ ─ ─ ─ ─ ─

「東網Money18」fb專頁：有討論、有分析，齊來FUN享，贏盡●你Like