13個徵兆話你知　上司睇好你

20160114
  • 東網電視
    更多新聞短片
    喺職場上，真係咩人都有、各有各諗法。大家會話，返工都係「搵食啫」，唔使唸咁多呀？啱...之不過，上司like你定唔like你，就好可能會改變你一生喎；所以，呢齣真係完完全全係「職場人生連續劇」嚟架！
    嗱，我哋「上集」就講到有20個蛛絲馬迹，可以知道上司有冇唔妥你(冇睇？唔係嘛？唉，咁out架，即刻入嚟http://bit.ly/1Q7mmuG 睇番啦，咪話唔醒你)，「下集」不如就同大家講吓你同上司啲sweet sweet嘢啦！
    唔好諗多咗，其實係想教你點樣可以知道上司好睇得你起咁啫。嗱，上司要保持專業，除咗做Appraisal之外，佢點睇你，平日多數唔會講出口；但人始終係人，總有啲地方唔覺意流露咗出嚟，以下13個蛛絲馬跡，睇吓你有冇事事但但中一樣。
    ─ ─ ─ ─ ─ ─ ─ ─ ─ ─ ─ ─
    1、開咩會都有你份
    上司成日Call埋你開好多唔同嘅會，多過你啲同事？咁代表上司幾睇重你嘅智慧同判斷，認為你有貢獻。仲有，係人都想開會時有多個啱Key嘅係旁邊，叫埋你去，明喇啩。
    2、咩Project都關你事
    個個大Project都有你份？一個接一個、一個比一個難？都係Spider-Man嗰句「能力愈大，責任愈大」啦！上司見你每次都搞得掂，信任你嘅能力，先至責任打孖咁上。千祈咪呻壓力大，隔離位聽到分分鐘葡萄緊你囉。
    3、帶埋你出Trip開會
    上司成日要你跟佢出Trip？帶埋你去同第二個部門開會？咁代表佢睇得你起，想帶你出去見世面，畀機會你學嘢；即係上司幫緊你嘅事業發展。
    4、對你零舍管少啲
    上司對你零舍管少啲？無論係工作安排定點做法，你比其同同事有更多嘅彈性同自由？上司容許你似朋友多過似下屬咁同佢講嘢？甚至有時畀權你代佢出面講嘢同行事？恭喜你，咁即係上司信任你嘅判斷。
    5、出事第一個搵你
    公司有乜出事或者有大嘢要立即搞掂時，上司第一個搵你幫拖？好明顯，上司完全信任你嘅處事能力。
    6、有筍嘢梗醒你先
    所有電影、演唱會優先場門票......上司收親咩筍嘢，都係醒你先；與其覺得唔係幾好意思，不如同上司講句多謝，然後繼續畀心機做嘢。
    7、對你要求高啲啲
    上司成日要你再做好啲、要你再投入啲畀多啲Input？對你要求零舍高咁？冇錯，佢擺明係針對你！即是咁，佢睇好你嘅能力，自然想你Input多啲；對你要求高啲，事關「愛之深，責之切」嘛。
    8、容許你直接坦率
    上司對你嘅氣量特別大？畀你可以好直接坦率咁講嘢？就算你話佢對成班手下太Chur，佢聽住都無黑面，仲接受你嘅意見？咁代表上司真心重視你嘅睇法。
    9、對你特別放晒手
    覺得上司好似唔多過問你嘅返工放工時間？啲嘢又由得你自己決定？對你直頭係「放手，放開所有」？對其他同事唔係咁？你應該開心都嚟唔切，事關咁代表佢信你多過其他人，所以對你特別放晒手。
    10、同你傾個人嘢
    上司同你傾、畀你知佢屋企個人嘢？多過其他同事？咁好大機會你好得佢心，佢唔單止信你，仲覺得你喺職能以外一樣有能力畀到意見佢，幫到手。
    11、洩漏天機你知
    上司如果同你講公司重要嘢，仲要補句「你自己知就算，唔好講出去......」，咁就真係唔得了，你絕對係佢最信任嘅戰友。
    12、私人聚會預埋你
    過時過節或者生日Party呢類私人聚會，上司會請埋你同佢啲朋友或家人一齊慶祝。成公司咁多人，佢淨係請你，你懂啦。
    13. 感覺有強大後盾
    如果連你自己都覺得，做嘢時可以「自動波」唔使左顧右顧，分分鐘其實可能係你上司唔聲唔聲喺後面幫你撐住(非自我感覺良好嗰隻喎)。
    ─ ─ ─ ─ ─ ─ ─ ─ ─ ─ ─ ─
    嗱，講咗打工仔13個吉兆，如果換個角度，到你做上司，想提拔人才，但又唔想其他下屬唔開心，咁點算呢？得，等安俊人力資源顧問董事總經理周綺萍教路。
    上司賞識個別下屬，周綺萍話「會否令其他同事有Hard Feelings（埋怨），好睇係咪有個Vaild（合理）嘅原因」，即是係因為工作能力還是裙帶關係。「一旦失去公平性，就會容易引起不滿」，嚴重嘅話仲可能出現杯葛。
    上司提拔人才，最緊要「透明、公開同溝通」，周綺萍教路，可以公開講明嗰位員工喺某方面「好努力、做得出色，於是可以得某啲嘢作為回報。」總之要其他同事明白「佢係因為乜嘢，所以得到乜嘢」。
    咁做有3個好處：第1、可以減少猜忌；第2、大家都明點解；第3、佢可以做Role Model（榜樣）激勵士氣，即是等於話畀大家聽「如果能夠做得到，你一樣可以備受賞識」。
    ─ ─ ─ ─ ─ ─ ─ ─ ─ ─ ─ ─
    另外，如果你作為被睇好嗰個，但又唔想犯眾憎？亦可以睇睇周綺萍點comment。
    你若然受到上司賞識，記緊「保持謙厚」，唔好以為自己「好巴閉睇小其他同事」，要繼續對人友善；同事向你請教，就要教人，「人哋先會支持你」。
    真係咁唔好彩，因為得上司睇好而遭同事針對？「要真係有事情發生咗、妨礙你工作，而以你嘅Position（職位）又冇辦法解決，先好同上司反映」。
    上司係因為你有能力先提拔你，如果少少事就同佢講，「就會顯得你好Gossipy」；講到尾，辦公室政治，「有人嘅地方就會有」，所以要先試吓自己解決。
    ─ ─ ─ ─ ─ ─ ─ ─ ─ ─ ─ ─
    想領悟更多理財智慧，富足一世？即刻click入「致富智庫」
    http://bit.ly/1QWtuLg