呂志和話身家是數字遊戲 唔想退休等死
20160120
東網電視
更多新聞短片
呂志和
今日嘉華國際(00173)主席呂志和喺佢公司北角總部搞左個新書發布會，推廣佢唯一授權畀人寫嘅<呂志和傳>。計計下，呂志和都將近90歲，好多人都關心佢公司傳承問題，幾時退休呀？
呂志和就話，而家早上返工，同同事可以傾下計，食下早餐，幾好。但如果退休，食物人地煮畀你，每日等日出、日中、日落，最後要等死。意謂冇退休計劃。
對於福布斯最新富豪排行榜，佢嘅排名下跌。呂志和就話，身家嘅野，數字遊戲黎嘅啫，帶唔走。所以唔應該睇錢睇得咁高尚、咁需要，呢啲野係煩惱黎嘅。此言一出即刻全場起哄，好多人都話願意同呂志和分享煩惱呀。
會上都爆咗一啲小片段，例如呂志和點解戴帽，呂志和話原來佢40多歲就頭髮開始稀疏，要出席一啲政府會議時，經常被冷氣吹到病。佢後來試過戴假髮，但因為大汗而覺得唔舒服。終於有一次，女兒買咗一頂帽畀佢戴，開頭因為唔慣而難為情，後來戴慣左，就成為佢嘅標誌。仲有原來現在公司嘉華，名字嘅由來，係佢以前2家做得比較大嘅公司嘅名合併而成。
講番呢本新書，佢話出版原因係想同大家分享人生經歷，點樣做人處世。雖然佢經歷日治時代，家族生意又多起伏，但佢而家睇番覺得唔係困苦，而係樂趣。勉勵年輕人唔好少少事就自殺。而有心創業嘅人就應該勤奮，不恥下問和有誠信，廣交朋友，咁機會到來就可以把握。
聽公關講原來呢本書預備咗3年，作者寫咗1年之後，就停咗工，然後第一個版本被完全棄用。到1年半前才重新復工，真係一番心血架。
─ ─ ─ ─ ─ ─ ─ ─ ─ ─ ─ ─
「東網Money18」fb專頁：有討論、有分析，齊來FUN享，贏盡●你Like