唔想「煩到爆」？專家醒你15招減壓法
20160127
東網電視
更多新聞短片
返學有壓力，返工有壓力，過節一樣有壓力！尤其係過年。畀人「哦」住要執屋，跟手又話團年飯食乜幾時食邊家食先....仲要應付拜年時阿伯父個表兄個老婆問你搵幾錢個月幾時派利是乜乜乜...唉，好煩呀！煩到就嚟要爆喇！真係逗到利是都未必治愈到個心靈呀？
咁點算？睇吓專家教你15招減壓神技啦，有啲你實唔識。仲有十日八日就過年，睇得嚟啱。
─ ─ ─ ─ ─ ─ ─ ─ ─ ─ ─ ─
1、先整To-Do List
預早計劃定，整埋個To-Do List出嚟，唔好去到最後一分鐘先諗拜年著咩衫、帶邊位男友女友返屋企團年、買咩禮物去同人哋阿爸阿媽拜年。冇張To-Do List看門口會點？專家話會有蔡格尼克效應(Zeigarnik Effect)。乜來？即係有嘢未搞掂、心掛掛，輕則心神恍惚，重則神經衰弱。
2、記得深呼吸
假期塞滿節目，仲忙過返工？小心唔記得透氣。依家立即行出房、離開人群，來一秒深呼吸。咁可以撻著身體個放鬆Mode，血壓都降番。
3、啲計劃唔好咁「離地」
一個新年，N個女友男友。48小時內想分別約晒A、B、C、D出嚟，計劃一個帶返屋企見阿媽、一個翹住行年宵、一個攬實唱K、一個陪拜年？唔畀佢哋發現對方都有難度，莫講話你係唔係有心有力。諗得貼地啲，定啲自己能力範圍內嘅Plan，唔好自己逼自己埋牆角。
4、留意頭暈身㷫
美國心理協會提提你，燥底、易攰、頭痛、胃部不適、覺得好怯、胃口變晒，中咗即係代表你壓力好大，發覺自己有要及早處理，咪等爆煲先嚟收拾。
5、Plan定個Budget
啱啱先交完稅，又話過年，過年支出多。有利是逗嗰啲，就話有得幫補吓；派利是嗰啲，冇陰功。Plan定個使錢預算，望住個Plan做人，唔好使凸。如果利是派得多，咪減少啲其他消費，拉上補下囉！
6、忌暴飲暴食
雖則過年，亦唔好暴飲暴食，均衡飲食可以減壓，即是適量嘅穀類、瘦肉、生果同蔬菜。愈大壓力愈唔好暴飲，事關醫學證明酒精會加壓。
7、笑吓「那些年」
節日同家人朋友一齊，會勾起好多「那些年」，花少少時間去回味美好嗰啲，大笑出嚟，係個好好嘅減壓方法。美國研究顯示，大笑、瑜伽、同閱讀，都有效減壓，對學生哥尤其Work。
8、吹水益身心
同Friend吹水可以減壓，絕對有數據支持。美國心理協會做過統計，話自己冇傾訴對象嘅人當中，一成後有43%壓力指數升咗。
9、聽歌降血壓
有壓力？立即開機聽嘢。大自然嘅聲音同古典音樂(貝多芬、莫扎特同威爾第呢類)有助降血壓。嗱，唔係乜音樂都得，Hip-Hop同Pop就冇乜作為，甚至仲搞到血壓高咗添，英國心血管協會話嘅。
10、出街跑吓步
運動令大腦釋放安多酚，令人開心啲、壓力少啲。雖然渣馬已過，但跑吓步唔使睇潮流嘅，食團年飯前出街跑兩跑，飯後年宵行兩轉，最啱係一班親朋戚友齊齊出動。
11、最緊要夠瞓
研究顯示(查實唔使研究講，係人都知)，唔夠瞓容易出現受壓、焦慮、焦躁，個躁底仲會Keep到第2日。
12、食飽眠一眠
食飽眠一眠，快活過神仙。瞓個晏覺，可降體內皮質醇，立即減壓。又多個理由食飽就瞓。
13、識得啱timing「閃開」
就算同屋企人感情幾好，都會有頂唔順之時，爆之前就要識閃，總之行開吓。Tips係，唔好自己一個走咗去，挾個人同你一齊入廚房幫手，或者同小朋友玩，就冇咁礙眼
14、壓力要日日清
壓力啱啱開始時，就要嗱嗱聲K.O.佢，仲要日日清，事關累積落嚟會變抑鬱。
15、搵醫生求救
上述14招出齊都搞唔掂？似乎係時候搵專業人士或醫生傾傾。
─ ─ ─ ─ ─ ─ ─ ─ ─ ─ ─ ─
嗱，以上15點，唔係齋吹水架。不過，其實每個人慢慢停低思考一下，都好容易搵到自己減壓方式，有啲可能好「離地」，唔係你同我可以做到，但亦有啲好簡單啫，試吓亦無妨！
●雅虎CEO邁耶
喺屋企焗Cupcake。
●Huffington Post創辦人赫芬頓
瞓足8粒鐘。
●蘋果創辦人之一沃茲尼亞克
玩Segway Polo(賽格威馬球)，呢種「馬球」唔係騎馬，係踩住架Segway車玩。
●網上軟件生產商Salesforce CEO貝尼奧夫
做瑜伽。
●股神巴菲特
彈夏威夷小結他(Ukulele)。
●PayPal始創人之一蒂爾
上網捉棋。
●興業金融證券董事鄭家華
同朋友聚會、睇書、寫作及遊歷。
●訊匯證券行政總裁沈振盈
瞓覺、睇電視、睇書、小注怡情賭馬賭波。
●豐盛金融資產管理董事黃國英
練氣功(太極五行功)、睇戲、寫專欄。
●金利豐研究部執行董事黃德几
打開晒架車全部窗包括天窗，然後駕到東區走廊爽一轉，可惜年紀漸長、又有仔有女，架車變成七人車，「飛」唔起了！
●君陽證券助理研究經理羅湋楠
睇電影、煲劇。
●富昌證券研究部總監譚朗蔚
帶兩歲半囝囝到郊外野餐、踩單車。
─ ─ ─ ─ ─ ─ ─ ─ ─ ─ ─ ─
想領悟更多理財智慧，富足一世？即刻click入「致富智庫」
「東網Money18」fb專頁：有討論、有分析，齊來FUN享，贏盡●你Like