m18講場：耀才陳啟峰退休　大搞Farewell

上市公司管理層調動雖屬平常事，但耀才證券(01428)今次嘅新聞稿寫得零舍生鬼。

話說下月底耀才證券行政總裁陳啟峰(Nelson)辭任，公司行政總裁及授權代表職位由執行董事及聯席行政總裁許繹彬接任。公司就出新聞稿話Nelson要實現夢想50歲後退休，享受人生嘆世界，仲跟手大讚自家主席葉茂林「有情有義」，幫Nelson喺中環夜場Zentral包場搞Farewell咁話！咁溫馨嘅新聞稿，相信公司上上下下睇完，內心都會湧起一股暖流啦！

陳啟峰(Nelson)50歲就可以退休享受人生，相信係唔少人嘅夢想!喺金融行業打滾咗30年嘅陳啟峰話，入行嘅時候已經覺得呢行搵錢快好多，而工作辛苦，係要早啲退休，自己做咗咁多年，做出一定成績，係時候功成身退。

佢話，返工嘅時候成日出街食飯，退休後就想做吓「煮飯公」，多啲自己整野食，仲想環遊世界同埋做多啲運動keep fit;依家亦計劃緊移民加拿大，方便見到屋企人。

─ ─ ─ ─ ─ ─ ─ ─ ─ ─ ─ ─

「東網Money18」fb專頁：有討論、有分析，齊來FUN享，贏盡●你Like