睇樓逐呎度：上水海禧華庭　廳長近20呎

不時聽到音響發燒友呻「屋企廳細細，想擺Hi-Fi冇晒計！」今次同大家逐呎度上水海禧華庭2房戶，個廳長近20呎，就算豪擺套7.1音響，同埋全球最大的120吋4K電視都仲得，隨時打造一個迷你家庭式影院，享受悠閒私人時光。

今次帶大家去逐呎度的單位，是上水海禧華庭2座F室，建築及實用面積分別為517及383方呎。老實說，單位內有不少角位，實用率不足7成半，略嫌遜色。另外，單位不設玄關，客飯廳布局分明，雖然面積只得140方呎，但長近20呎的大廳，就成為整個則的最大賣點，配以9.52呎樓底，放置大型家具話咁易。此外，客飯廳盡頭備有落地大玻璃窗，視野寬敞開揚，兼且光猛十足。

至於主人房，設計則「三尖八角」，有角位及虛位。細房間隔則較四正，面積約46方呎，地方好用，惟窗位以半弧形開則，想善用窗台慳位有難度。

值得留意的是，毗鄰主人房的浴室亦有角位，幸好空間尚算闊落，未算逼狹。

─ ─ ─ ─ ─ ─ ─ ─

坐落於石湖墟一帶的海禧華庭，樓齡約15年，較上水名都、上水中心等區內指標屋苑「年輕」得多，同時居住密度較低，兩座物業提供不足300伙，大部分單位可享開揚市景或山景。屋苑設有商場、停車場及住客會所，附近亦有不少平民食肆。

美聯營業經理陳添鑫表示，海禧華庭規模細，且由用家主導，買賣放盤稀少，目前僅1個2房戶放售，實用面積394方呎的低層A室，業主叫價380萬元，由去年高位價下跌逾7%，屬過去一年內新低。而上述的單位則暫時未有放盤。

他續說，屋苑今年僅錄1宗3房成交，對上1宗2房交投追溯到去年7月，一個實用面積383方呎的中層F室，以406萬元獲承接。

─ ─ ─ ─ ─ ─ ─ ─

香港樓市日日新鮮，話題多多，想睇晒最update樓市新聞短片，即刻click入 http://bit.ly/1M2kP95

樓市轉勢，癲價時代告終，上車客、換樓客終於迎來入市機會，今年「真的上車了」！ http://bit.ly/1zZzAUd