淘寶客必看：應付支付寶凍結資金招數

20160429
  • 東網電視
    更多新聞短片
    仲有唔夠一個月，香港人就用唔到支付寶啦，除非你嗱嗱聲喺5月20日前返內地開個銀行戶口做「綁定」啦！
    支付寶官方向用戶發出消息：「根據中國大陸監管要求，請盡快辦理並綁定您的中國大陸銀行卡以補充支付寶身份信息...如你無法完成綁定，為了不影響你的餘額使用，請在北京時間2016年5月20日零點之前將支付寶帳戶餘額用完。」
    簡單來說，5月20日前，一係用晒支付寶入面嘅錢；一係開個內地戶口做綁定。
    新要求真係極之非常唔方便！ 小編整理一啲常見問題，希望幫到大家：
    (1) 點可以盡快用晒支付寶嘅錢呀？
    除咗可以自己淘寶，仲可以P2P過數畀其他已經綁定嘅朋友(內地親朋、有內地戶口的香港親友)。今個月返開內地，不妨用支付寶搭的士、買珍珠奶茶，其實依家內地商戶大大小小都收支付寶，去一趟深圳食飯唱K，餘額相信已經用得七七八八。
    (2) 點可以開內地銀行戶口呀？
    直接回深圳開，需注意有啲銀行戶口可能要求用戶要有內地電話號碼。唔想返內地，可以喺香港嘅永隆(開永隆內地戶口)、建行亞洲(開建行戶口)或者工銀亞洲(開工行戶口)等中資行做見證開戶。時間要預鬆些少，開戶口隨時要兩星期先完成。開完銀行戶口上淘寶或者支付寶官方網頁就可以綁定支付寶帳戶。
    (3) 綁定好麻煩，到底值唔值得為淘寶開個內地戶口呢？
    每個月都淘一千幾百人仔嘅朋友，都係開內地戶口做綁定吧！雖然PPS、八達通、信用卡等都可以淘寶，但全部都收手續費，小數怕長計呀！最大問題係內地其他服務，好似微信支付咁，未來都有機會要求綁定內地銀行戶口，早開早享受呀！
    (4) 綁定真係太麻煩，唔要支付寶仲淘唔淘到寶呀？
    淘到！港澳地區可以用PPS、八達通、信用卡、上商銀行戶口畀錢，收費如下：
    付款方式●手續費
    上商銀行戶口●1%
    PPS●1.5%
    八達通●1.5%
    信用卡（VISA/master/JCB)●3%
    小編再提多次，5月20日前支付寶一定要綁定內地銀行戶口，唔綁定就會被凍結資金！！！
    ─ ─ ─ ─ ─ ─ ─ ─ ─ ─ ─ ─
    香港樓市唔再係升值保證，想投資物業仲會唔會有新出路呢？即刻click入http://bit.ly/1STtNsl 睇睇你就知。