樓市勁哥金榜：舖市行衰運

早前有內地女遊客在銀行「席地而瞓」，唔通經濟真係差到要瞓街？實情係各行各業搵食更加難，分析估，今年可能有成15000間企業破產，係08年金融海嘯之後最慘。唔少企業都做唔住要退租，連帶商舖業主都要減價賣舗，真係要講返句「Oh，Bad luck」~今個星期，樓市勁哥金榜：舖市行衰運！

●第3位：銅鑼灣舖狠劈40%求甩貨

早排有強國「小孩兒」畀「熱情香港好客之道」感化咗，禮尚往來送咗舊「金」畀我哋......唔知係咪呢舊「金」太勁，嚇到核心區舖頭嘅業主都急住套現走人！銅鑼灣利園山道一個1800呎嘅相連舖位，由2014年時開價4億幾，減到2.5億求售，足足劈咗1.7億！呎價仲平過隔離舖頭一半添！舊「金」咁猛，真係要多謝呢班同胞喇！(曲線要講明)

●第2位：老銅Neway棄租地下同1樓

不論係67890後，K房都可以話係滿載大家「那些年」嘅回憶。但係......呢份回憶要縮水喇！係咪接受唔到呢？有傳承租銅鑼灣怡和街樂聲大廈地下至3樓巨舖，10幾年嘅Neway，將會棄租地下及1樓，一共大約2.6萬方呎樓面，只會續租2樓同3樓。失戀要唱飲歌嘅朋友，可能就要麻煩你，請移玉步上多層喇。

●第1位：5舊水就可開舖做老闆

5舊水就可以開舖做老闆！？佐敦彌敦道就有本身750呎嘅地舖，最細劏到3呎乘3呎咁，以每日500蚊起短租出去。如果租返個位幫人飛髮，收20蚊位，可能都有得做喎！不過而家啲人坐緊巴士，都可以自己剃頭 ，睇嚟生意都幾難做囉~

─ ─ ─ ─ ─ ─ ─ ─ ─ ─ ─ ─

「東網Money18」fb專頁：有討論、有分析，齊來FUN享，贏盡●你Like